“திமுக ஆட்சியில் ரூ.25 லட்சம்.. விஜய் ஆட்சியில் ரூ.0″…. பொறுப்பேற்ற 1 மாதத்தில் வரலாற்று சாதனை… கல்வித்துறையில் லஞ்ச ஒழிப்பு ஆட்டத்தைத் தொடங்கிய முதல்வர் விஜய்….!

தமிழகத்தில் கடந்த இரண்டு ஆண்டுகளாக தேங்கிக் கிடந்த 1,000 தனியார் பள்ளிகளுக்கான தொடர் அங்கீகார ஆணைகள், தற்போதைய முதல்வர் விஜய் தலைமையிலான அரசால் நேற்று ஒரே நாளில் வழங்கி முடிக்கப்பட்டுள்ளன. சென்னை கோட்டூர்புரத்தில் நடைபெற்ற சிறப்பு நிகழ்ச்சியில், பள்ளிக்கல்வித்துறை அமைச்சர் ராஜ்மோகன் இந்த அங்கீகாரக் கடிதங்களை முறைப்படி பள்ளிகளின் நிர்வாகிகளிடம் வழங்கினார். கடந்த இரண்டு வருடங்களாக இழுபறியில் இருந்த கோப்புகளுக்கு, புதிய அரசு பொறுப்பேற்ற ஒரே மாதத்திற்குள் தீர்வு காணப்பட்டிருப்பது தனியார் பள்ளி நிர்வாகிகளிடையே பெரும் மகிழ்ச்சியையும் வரவேற்பையும் பெற்றுள்ளது.

இந்த வரலாற்றுச் சிறப்புமிக்க நடவடிக்கை குறித்து சென்னை தலைமைச் செயலகத்தில் செய்தியாளர்களிடம் பேசிய தனியார் பள்ளி கூட்டமைப்பின் நிர்வாகிகள், முந்தைய திமுக ஆட்சியில் நிலவிய முறைகேடுகளை வெளிப்படையாகக் குற்றஞ்சாட்டினர். கடந்த ஆட்சியில் பள்ளிகளின் அங்கீகாரத்தைப் புதுப்பிக்கக் குறைந்தபட்சம் 1 லட்சம் முதல் 5 லட்சம் ரூபாய் வரையிலும், சி.பி.எஸ்.இ. பள்ளிகளுக்கான தடையில்லா சான்றிதழ் பெற 25 லட்சம் ரூபாய் வரையிலும் ‘கட்சி நிதி’ என்ற பெயரில் கொடுக்க வேண்டிய கட்டாயம் இருந்ததாக அவர்கள் வேதனை தெரிவித்தனர். அவ்வாறு பெருந்தொகை கொடுத்த பின்பும் கூட, கோப்புகள் நகராமல் காலதாமதம் செய்யப்பட்டு வந்ததாக அவர்கள் சுட்டிக்காட்டினர்.

ஆனால், தற்போது முதல்வர் ஜோசப் விஜய்யின் அதிரடி உத்தரவால், லஞ்ச ஊழலுக்கு முற்றுப்புள்ளி வைக்கப்பட்டு, ஒரு ரூபாய் கூட செலவில்லாமல் இந்தத் தொடர் அங்கீகார ஆணைகள் வழங்கப்பட்டுள்ளன. கல்வித்துறையில் இதுவரை இல்லாத இந்த வெளிப்படையான நடைமுறையை “வரலாற்றுச் சிறப்புமிக்கது” என்று பாராட்டிய கூட்டமைப்பினர், இதற்கு முன்பு செங்கோட்டையன் பள்ளிக்கல்வி அமைச்சராக இருந்தபோது மாவட்ட வாரியாக அமைச்சரே நேரடியாக அங்கீகார ஆணைகளை வழங்கிய நடைமுறையை நினைவு கூர்ந்தனர். அதே பாணியில் தற்போதைய அமைச்சர் ராஜ்மோகனும் நேரடியாகவே ஆணைகளை வழங்கியுள்ளார் என்று கூறி அரசுக்குத் தங்கள் நெஞ்சார்ந்த நன்றியைத் தெரிவித்துக் கொண்டனர்.

இவ்விழாவின் போது, பள்ளிகளுக்கு இனி அங்கீகாரச் செலவுகள் மிச்சமாவதால், ஏழை எளிய மாணவர்கள் பயனடையும் வகையில் தனியார் பள்ளிகள் தங்கள் கல்விச் கட்டணத்தைக் குறைக்க வேண்டும் என்று அமைச்சர் ராஜ்மோகன் கோரிக்கை விடுத்துள்ளார். அமைச்சரின் இந்த வேண்டுகோளை ஏற்றுக்கொண்ட தனியார் பள்ளி கூட்டமைப்பின் நிர்வாகி, “நிச்சயமாக எங்கள் அமைப்பின் அவசரக் கூட்டத்தைக் கூட்டி, கல்விச் கட்டணத்தை எந்த அளவுக்குக் குறைக்க முடியும் என்பது குறித்து விரிவாக ஆலோசித்து நல்ல முடிவை எடுப்போம்” என்று உறுதியளித்துள்ளார். இம்மாற்றம் தமிழகக் கல்வித்துறையில் ஒரு ஆரோக்கியமான சூழலை உருவாக்கும் என எதிர்பார்க்கப்படுகிறது.