சென்னையில் பணிபுரியும் மற்றும் கல்வி பயிலும் பெண்கள் பலரும் பாதுகாப்பு மற்றும் சிக்கனத்திற்காக நண்பர்களுடன் இணைந்து வீடுகளை வாடகைக்கு எடுத்து தங்குவது வழக்கம். அப்படி விருகம்பாக்கம் பகுதியில் தங்கியிருந்த 7 இளம்பெண்கள், தங்கள் வீட்டில் இருந்த எலித் தொல்லையை ஒழிக்க மேற்கொண்ட ஒரு தவறான முயற்சி விபரீதத்தில் முடிந்துள்ளது. எலிகளைக் கொல்ல தேங்காயில் விஷம் தடவி வைத்திருந்ததை அறியாத மற்றுமொரு பெண், அதே தேங்காயைப் பயன்படுத்தி சட்னி அரைத்துள்ளார். அதைச் சாப்பிட்ட நான்கு பெண்களுக்குத் தலைசுற்றல் மற்றும் வயிற்று வலி ஏற்பட்டதையடுத்து, அவர்கள் உடனடியாக ராயப்பேட்டை அரசு மருத்துவமனையில் அனுமதிக்கப்பட்டனர்.
எலி மருந்துகளில் கலக்கப்படும் வேதிப்பொருட்கள் மனித உடலுக்கு மிகவும் ஆபத்தானவை. குறிப்பாக, சந்தையில் எளிதாகக் கிடைக்கும் ‘மஞ்சள் பாஸ்பரஸ்’ (Yellow Phosphorus) போன்ற நச்சுகள் கல்லீரலை நேரடியாகத் தாக்கும் தன்மை கொண்டவை. இந்த நச்சு இரத்தத்தில் கலக்கும்போது கடுமையான வாந்தி, வயிற்றுப்போக்கு மற்றும் உள் உறுப்புகளில் இரத்தப்போக்கு போன்ற பாதிப்புகளை உண்டாக்கும். பல நேரங்களில் இதன் அறிகுறிகள் உடனடியாகத் தெரியாமல், இரண்டு மூன்று நாட்கள் கழித்தே வெளிப்படும். அந்தச் சமயத்தில் கல்லீரல் முழுமையாகச் செயலிழந்திருக்க வாய்ப்புள்ளதால், பாதிப்பு உயிரிழப்பு வரை கொண்டு செல்லக்கூடும்.
இந்தச் சம்பவத்தில் பாதிக்கப்பட்ட பெண்கள் நல்வாய்ப்பாக உடனடியாக மருத்துவமனைக்கு அழைத்துச் செல்லப்பட்டுள்ளனர். தற்கொலை முயற்சிகளில் அதிக அளவு விஷம் உட்கொள்ளப்படும் சூழலை விட, இது போன்ற விபத்துகளில் நச்சின் அளவு குறைவாக இருக்க வாய்ப்புள்ளது. இருப்பினும், விஷம் உட்கொண்ட சில மணிநேரங்களிலேயே மருத்துவமனைக்குச் சென்று ‘வயிறு கழுவப்படுவது’ (Gastric Lavage) உயிர் பிழைப்பதற்கான வாய்ப்பை அதிகரிக்கும். சிகிச்சைக்குச் செல்லும்போது உட்கொண்ட எலி மருந்தின் பாக்கெட் அல்லது அதன் பெயரை மருத்துவரிடம் காண்பிப்பது, சரியான ‘ஆன்டிடோட்’ (நச்சு முறிவு மருந்து) வழங்க மிகவும் உதவியாக இருக்கும்.
இது போன்ற விபத்துகளைத் தவிர்க்க மக்கள் மிகுந்த எச்சரிக்கையுடன் இருக்க வேண்டும். எலி மருந்து வைப்பதாக இருந்தால், வீட்டில் உள்ள மற்றவர்களிடம் அதைத் தெளிவாகத் தெரிவிக்க வேண்டும். குறிப்பாக உணவுப் பொருட்கள் வைக்கும் இடங்களில் விஷத்தைப் பயன்படுத்துவதைத் தவிர்க்க வேண்டும். மருத்துவர்களின் அறிவுரைப்படி, மஞ்சள் பாஸ்பரஸ் கலந்த எலி மருந்துகளைப் பயன்படுத்துவது உயிருக்கே உலை வைக்கும் என்பதால், மக்கள் மாற்று முறைகளைக் கையாள்வதே சிறந்தது. அஜாக்கிரதையால் ஏற்படும் ஒரு சிறிய தவறு, வாழ்நாள் முழுவதும் ஈடு செய்ய முடியாத இழப்பை ஏற்படுத்திவிடும் என்பதை இச்சம்பவம் நமக்கு உணர்த்துகிறது.