எடப்பாடி பழனிசாமி சொன்ன அந்த வார்த்தை.. ‘மனசு உடைஞ்சுருச்சு’… இதுவரை சொல்லாத உண்மையை போட்டுடைத்த பிரேமலதா விஜயகாந்த்..!!!

தமிழக சட்டமன்றத் தேர்தல் களம் சூடுபிடித்துள்ள நிலையில், அதிமுக பொதுச்செயலாளர் எடப்பாடி பழனிசாமிக்கும், தேமுதிக பொதுச்செயலாளர் பிரேமலதா விஜயகாந்துக்கும் இடையேயான வார்த்தைப்போர் உச்சக்கட்டத்தை எட்டியுள்ளது. தேமுதிகவிற்கு வெறும் 0.5% வாக்கு வங்கி மட்டுமே இருப்பதாக இபிஎஸ் விமர்சித்து வரும் நிலையில், அதற்குப் பதிலடி கொடுத்துள்ள பிரேமலதா, கடந்த நாடாளுமன்றத் தேர்தலில் 5 தொகுதிகளை அதிமுக ஒதுக்கியபோது இந்த வாக்கு விகிதம் அவருக்குத் தெரியவில்லையா எனக் கேள்வி எழுப்பியுள்ளார். தேமுதிகவை இபிஎஸ் தொடர்ந்து விமர்சிப்பது, அக்கட்சியின் முக்கியத்துவத்தை அவர் உணர்ந்துள்ளதையே காட்டுகிறது என்று பிரேமலதா சாடியுள்ளார்.

அதிமுக உடனான கூட்டணி முறிவுக்கு முக்கிய காரணமாகக் கருதப்படும் ராஜ்ய சபா சீட் விவகாரம் குறித்து பிரேமலதா தற்போது விரிவான விளக்கமளித்துள்ளார். தேமுதிகவுக்கு ராஜ்ய சபா சீட் தருவதாக எடப்பாடி பழனிசாமி கையெழுத்திட்ட ஒப்பந்தத்தை அவர் பகிரங்கமாக வெளியிட்டார். அரசியல் நாகரிகம் கருதி இதுவரை இதனை மறைத்து வைத்திருந்ததாகவும், ஆனால் இபிஎஸ் தொடர்ந்து அவதூறு பரப்பியதால் உண்மையை நிரூபிக்க அந்த ஒப்பந்தத்தை வெளியிட வேண்டிய நிலைக்குத் தள்ளப்பட்டதாகவும் அவர் தெரிவித்துள்ளார். அந்த ஒப்பந்தத்தில் வருடம் குறிப்பிடாதது குறித்து கேட்டபோது, தனது வார்த்தையே முக்கியம் என இபிஎஸ் உறுதியளித்ததையும் பிரேமலதா நினைவு கூர்ந்துள்ளார்.

தொலைபேசி உரையாடலில் நடந்த கசப்பான சம்பவங்கள் குறித்து பேசிய பிரேமலதா, 2025-ல் ராஜ்ய சபா சீட் வழங்க முடியாது என்பதை இபிஎஸ் ஒரு வார்த்தை கூட தன்னிடம் சொல்லவில்லை எனக் குற்றம் சாட்டியுள்ளார். மாறாக, செய்தியாளர்கள் சந்திப்பில் தேமுதிகவை ‘யார் யாரோ’ எனக் குறிப்பிட்டது கட்சியின் தொண்டர்களிடையே மிகுந்த மனவருத்தத்தை ஏற்படுத்தியதாகத் தெரிவித்தார். இது குறித்து அவரிடம் போனில் கேட்டபோது, தான் அவ்வாறு பேசவில்லை என மழுப்பலாகப் பதிலளித்ததாகவும், இத்தகைய அணுகுமுறையே அதிமுக கூட்டணியிலிருந்து விலகி திமுகவுடன் இணையக் காரணமாக அமைந்தது என்றும் அவர் கூறியுள்ளார்.

வரலாற்றில் முதல்முறையாக திமுகவுடன் கூட்டணி அமைத்துள்ள தேமுதிக, இந்தத் தேர்தலில் 10 சட்டமன்றத் தொகுதிகள் மற்றும் ஒரு ராஜ்ய சபா சீட் ஆகியவற்றை ஒப்பந்தம் செய்துள்ளது. இந்த வெற்றிகரமான கூட்டணி ஒப்பந்தம் அதிமுக தரப்பில் விமர்சனங்களை உருவாக்கியுள்ள போதிலும், தேமுதிக தொண்டர்கள் மிகுந்த உற்சாகத்தில் உள்ளனர். எடப்பாடி பழனிசாமியின் விமர்சனங்களுக்கு மக்கள் மன்றத்தில் உரிய பதிலடி கொடுக்கப்படும் எனத் தெரிவித்துள்ள பிரேமலதா, தற்போது திமுக கூட்டணியின் வெற்றிக்காகத் தீவிரப் பிரச்சாரத்தில் ஈடுபட்டு வருகிறார். இவருடைய பரப்புரைக்கு அரசியல் களத்தில் பெரும் வரவேற்பு கிடைத்து வருவது குறிப்பிடத்தக்கது.