சென்னையில் நடைபெற்ற தேமுதிக மாவட்டச் செயலாளர்கள் மற்றும் நிர்வாகிகள் கூட்டத்தில் அக்கட்சியின் பொதுச்செயலாளர் பிரேமலதா விஜயகாந்த் தொண்டர்களிடையே உரையாற்றினார். அப்போது, கூட்டணி குறித்த அறிவிப்பு வெளியாகாதது குறித்து யாரும் கவலைப்பட வேண்டாம் என்றும், கட்சித் தொண்டர்களும் நிர்வாகிகளும் யாரோடு கூட்டணி அமைக்க விரும்புகிறார்களோ, அந்த விருப்பத்தின்படியே சரியான கூட்டணி அமையும் என்றும் அவர் உறுதி அளித்துள்ளார். கேப்டன் விஜயகாந்த் வழியில் தொண்டர்களின் மனநிலையை அறிந்து, கட்சிக்கு நலம் பயக்கும் முடிவையே தலைமை எடுக்கும் என்பதை அவர் தனது பேச்சின் மூலம் தெளிவுபடுத்தியுள்ளார்.
சமீபத்தில் நடைபெற்ற கட்சி நிர்வாகிகளின் ரகசிய வாக்கெடுப்பில், பெரும்பாலான மாவட்டச் செயலாளர்கள் அதிமுகவுடன் கூட்டணி அமைக்க ஆர்வம் காட்டியதாகத் தகவல்கள் வெளியாகியுள்ளன. இந்தச் சூழலில், பிரேமலதாவின் இந்த நம்பிக்கையூட்டும் பேச்சு தேமுதிக தொண்டர்களிடையே புதிய உற்சாகத்தை ஏற்படுத்தியுள்ளது. மக்களவைத் தேர்தல் களம் சூடுபிடித்துள்ள நிலையில், அதிமுக – தேமுதிக இடையிலான கூட்டணி பேச்சுவார்த்தை இறுதி கட்டத்தை எட்டியுள்ளதையே பிரேமலதாவின் இந்த மறைமுகமான சிக்னல் உணர்த்துவதாக அரசியல் விமர்சகர்கள் கருதுகின்றனர்.