தமிழகத்தில் சட்டமன்றத் தேர்தல் நெருங்க நெருங்க நாளுக்கு நாள் தேர்தல் களமும் சூடு பிடித்த வண்ணம் உள்ளது. குறிப்பாக விஜய் களத்தில் இறங்கியுள்ளதால் 2026 தேர்தல் களம் பரபரப்பாகவே பார்க்கப்படுகிறது. இதனிடையே சமீப காலமாகவே விஜய் கட்சியில் முக்கிய தலைவர்கள் பலரும் இணைந்த வண்ணம் உள்ளனர். அதிமுகவின் மூத்த தலைவரான செங்கோட்டையன் தமிழக வெற்றி கழகம் கட்சியில் இணைந்த கையோடு நேற்று முன்தினம் நாஞ்சில் விஜயன் தமிழக வெற்றி கழகம் கட்சியில் இணைந்தார்.
இவர்கள் இருவருக்குமே முக்கிய பதவி வழங்கப்பட்டுள்ளது. இவர்களை தவிர்த்து அதிமுக மற்றும் திமுகவை சேர்ந்த முக்கிய நிர்வாகிகள் பலரும் விஜய் கட்சியில் இணைய உள்ளதாக தகவல் கசிந்து கொண்டிருக்கும் சூழலில் திமுகவுடன் ஆன கூட்டணியில் குழப்பத்தை ஏற்படுத்த முயற்சித்ததாக பிரவீன் சக்கரவர்த்தி மீது காங்கிரஸ் தலைமை விரைவில் நடவடிக்கை எடுக்க உள்ளதாக தகவல் கசிந்துள்ளது. இதனால் தமிழக வெற்றி கழகம் கட்சியில் இணைய அவர் பேச்சுவார்த்தை நடத்தி வருவதாகவும் கூறப்படுகிறது. லோக்சபா தேர்தலில் மயிலாடுதுறையில் சீட் கிடைக்காதற்காக திமுகவின் தலையிட காரணம் என அதிருப்தியில் இருந்த பிரவீன் சமீபத்தில் விஜயை சந்தித்து பேசியது குறிப்பிடத்தக்கது.