அதிர்ச்சி வீடியோ…. வீதிகளில் அலறி அடித்து ஓடிய மக்கள்… பனாமாவை உலுக்கிய கோர நிலநடுக்கம்….. 40 முறை குலுங்கிய பூமி….!

பனாமாவில் சமீபத்தில் ஏற்பட்ட சக்திவாய்ந்த நிலநடுக்கம் அந்நாட்டு மக்களை பெரும் அச்சத்தில் ஆழ்த்தியுள்ளது. பனாமாவின் தெற்கு கடலோரப் பகுதியான ஹெர்ரேரா மாகாணத்தின் லா பிடலோசா அருகே, பூமிக்கு அடியில் சுமார் 12.6 கி.மீ. ஆழத்தில் இந்த நிலநடுக்க மையம் கொண்டிருந்ததாக அமெரிக்க புவியியல் ஆய்வு மையம் தெரிவித்துள்ளது. தலைநகர் பனாமா சிட்டி உள்பட நாடு முழுவதும் இதன் அதிர்வுகள் தீவிரமாக உணரப்பட்டன. அதனைத் தொடர்ந்து 40க்கும் மேற்பட்ட பின்தொடர் நில அதிர்வுகள் ஏற்பட்டதால், பீதியடைந்த மக்கள் வீடுகளை விட்டு வெளியேறி வீதிகளில் தஞ்சம் புகுந்தனர்.

இந்தப் பேரழிவின் எதிரொலியாக நாட்டின் இயல்பு வாழ்க்கை கடுமையாகப் பாதிக்கப்பட்டது. முன்னெச்சரிக்கை நடவடிக்கையாக விமான சேவைகள் தற்காலிகமாக நிறுத்தப்பட்டன, தலைநகரில் மெட்ரோ ரயில் இயக்கமும் முடங்கியது. மேலும், பாதுகாப்பு கருதி அனைத்து பள்ளி மற்றும் கல்லூரிகளுக்கும் விடுமுறை அறிவிக்கப்பட்டு, நாட்டின் பல பகுதிகளிலும் மின்சாரம் துண்டிக்கப்பட்டது. இருப்பினும், நிலநடுக்க மையத்திலிருந்து சுமார் 203 கி.மீ. தொலைவில் உள்ள உலகப் புகழ்பெற்ற வர்த்தக வழித்தடமான பனாமா கால்வாய் எவ்வித பாதிப்புமின்றி வழக்கம்போல் இயங்குவதாக அதிகாரிகள் உறுதிப்படுத்தினர்.

நிலநடுக்கத்தை அடுத்து சுனாமி எச்சரிக்கை விடுக்கப்பட்டு பின்னர் திரும்பப் பெறப்பட்டது நிலைமையைச் சீராக்கியது. பனாமா, கொலம்பியா மற்றும் மெக்சிகோ உள்ளிட்ட பசிபிக் கடலோர நாடுகளுக்கு விடுக்கப்பட்டிருந்த சுனாமி எச்சரிக்கை, ஆபத்து நீங்கியதை அடுத்து அமெரிக்க சுனாமி எச்சரிக்கை மையத்தால் அதிகாரப்பூர்வமாகத் திரும்பப் பெறப்பட்டது. அதிர்ஷ்டவசமாக இந்தச் சம்பவத்தில் உயிர்ச்சேதங்கள் அல்லது பெரிய அளவிலான பொருள் சேதம் குறித்த தகவல்கள் எதுவும் உடனடியாக வெளியாகவில்லை.