முன்னாள் திமுக அமைச்சர் பொன்முடி, சுமார் ஒன்றரை ஆண்டுகளுக்கு முன்பு நிகழ்ச்சி ஒன்றில் சைவம் மற்றும் வைணவப் பிரிவுகள் குறித்தும், பெண்கள் குறித்தும் சர்ச்சைக்குரிய வகையில் பேசிய ஒப்பீடு பெருத்த எதிர்ப்பைக் கிளப்பியது. அவரது சொந்தக் கட்சியினரே இந்த பேச்சைக் கடுமையாக விமர்சித்த நிலையில், திமுக தலைவர் மு.க.ஸ்டாலின் அவரை கட்சியின் துணைப் பொதுச்செயலாளர் பொறுப்பில் இருந்து நீக்கி உத்தரவிட்டார். மேலும், இதன் தொடர்ச்சியாக உருவான அரசியல் சூழல்களுக்கு இடையே, அவர் தேர்தலில் போட்டியிடுவதிலிருந்தும் ஒதுங்கியிருந்தார்.
இந்த நிலையில், தனது 76-வது பிறந்தநாளை விழுப்புரத்தில் உள்ள கலைஞர் அறிவாலயத்தில் திமுக தொண்டர்களுடன் பொன்முடி கொண்டாடினார். பிறந்தநாளையொட்டி கட்சித் தலைவர் மு.க.ஸ்டாலின் மற்றும் இளைஞரணிச் செயலாளர் உதயநிதி ஸ்டாலின் ஆகியோரிடம் வாழ்த்துகளைப் பெற்றதாகத் தெரிவித்த அவர், பெரியார், அண்ணா, கலைஞர் மற்றும் கழகத் தலைவரின் வழியில் திராவிட இயக்கக் கொள்கைகளுக்காகத் தொடர்ந்து பணியாற்றி வருவதாகக் குறிப்பிட்டார்.
செய்தியாளர்களிடம் பேசிய அவர், கடந்த காலங்களில் தான் பேசிய பேச்சு தொடர்பான வழக்கின் விசாரணை ஒத்திவைக்கப்பட்டுள்ளதைக் சுட்டிக்காட்டினார். தனது அன்றைய பேச்சு யாருடைய மனதையாவது புண்படுத்தியிருந்தால் அதற்கு ஏற்கனவே வருத்தம் தெரிவித்துள்ளதாகக் கூறிய அவர், வழக்கு தொடுத்த சகோதரி உட்பட மனவேதனை அடைந்த அனைவரிடமும் மீண்டும் உளமார்ந்த மன்னிப்பையும் வருத்தத்தையும் தெரிவித்துக் கொள்வதாகக் கூறினார்.
மேலும் தற்போதைய அரசியல் சூழல்கள் குறித்துப் பேசிய அவர், ஸ்டாலின் மக்களிடையே மிகுந்த செல்வாக்குடன் விளங்குவதாகவும், மக்கள் நிலைமையை உணர்ந்து வருவதாகவும் தெரிவித்தார். கல்லூரிக் கல்வி இயக்குநர் அனுப்பிய சுற்றறிக்கை மாணவர்களின் விழிப்புணர்வு காரணமாகத் திரும்பப் பெறப்பட்டதைப் பாராட்டிய அவர், மாணவர் பருவம் முதலே கொள்கைகளுக்காகப் போராடும் மாணவர்களின் விழிப்புணர்வுக்குத் தனது வாழ்த்துகளைத் தெரிவித்துக் கொண்டார்.