Breaking: வாக்குப்பதிவு முடிந்த கையோடு வந்த சோகமான செய்தி… தமிழக காவல்துறையில் அதிர்ச்சி…!

தமிழகத்தில் நடைபெற்று வரும் தேர்தல் பாதுகாப்புப் பணிகளுக்காக மாவட்டங்களுக்கு இடையே காவல்துறையினர் பணியிட மாற்றம் செய்யப்பட்ட நிலையில், ராமநாதபுரம் மாவட்ட மதுவிலக்கு அமலாக்கப் பிரிவில் துணை கண்காணிப்பாளராக (DSP) பணியாற்றி வந்த ராமகிருஷ்ணன் (58) என்பவர் திண்டுக்கல் மாவட்டம் ஒட்டன்சத்திரம் தொகுதிக்கு தேர்தல் கண்காணிப்புப் பணிக்காக அனுப்பப்பட்டார். ஒட்டன்சத்திரம் அருகேயுள்ள கள்ளிமந்தையம் மற்றும் இடைகோட்டை பகுதிகளில் நேற்று தீவிர தேர்தல் பணிகளில் ஈடுபட்டிருந்த அவருக்கு, திடீரென கடுமையான நெஞ்சுவலி ஏற்பட்டுள்ளது.

இதனைத் தொடர்ந்து, அங்கிருந்த சக காவலர்கள் அவரை மீட்டு உடனடியாக ஒட்டன்சத்திரத்தில் உள்ள தனியார் மருத்துவமனைக்கு கொண்டு சென்றனர். அங்கு அவரைப் பரிசோதித்த மருத்துவர்கள், மருத்துவமனைக்கு வரும் வழியிலேயே ராமகிருஷ்ணன் இதய செயலிழப்பால் உயிரிழந்துவிட்டதாகத் தெரிவித்தனர். தேர்தல் களத்தில் பாதுகாப்பு மற்றும் கண்காணிப்புப் பணிகளில் மிகுந்த அர்ப்பணிப்புடன் ஈடுபட்டிருந்த மூத்த அதிகாரி ஒருவரின் இந்தத் திடீர் மறைவு, அவருடன் பணியாற்றிய சக காவலர்களிடையேயும் தேர்தல் அதிகாரிகளிடையேயும் பெரும் அதிர்ச்சியையும் சோகத்தையும் ஏற்படுத்தியுள்ளது.

திண்டுக்கல் மாவட்டத்தில் உள்ள பழனி, ஒட்டன்சத்திரம், ஆத்தூர் உள்ளிட்ட 7 சட்டசபை தொகுதிகளில் நேற்று விறுவிறுப்பான வாக்குப்பதிவு நடைபெற்றது. மொத்தம் 115 வேட்பாளர்கள் களமிறங்கிய இந்தத் தேர்தலில், மாவட்ட அளவில் 89.25 சதவீத வாக்குகள் பதிவாகி சாதனை படைத்துள்ளது. ஜனநாயகக் கடமையை நிலைநாட்ட இரவு பகலாக உழைத்த ஒரு காவல்துறை அதிகாரி, பணியின் போதே உயிரிழந்த சம்பவம் அந்தப் பகுதியில் பெரும் சோகத்தை ஏற்படுத்தியுள்ள நிலையில், அவரது மறைவிற்குப் பல்வேறு தரப்பினரும் இரங்கல் தெரிவித்து வருகின்றனர்.