மகபூப்நகரில் காவல்துறையினர் நடத்திய கொடூரத் தாக்குதலில் ஃபயாஸ் என்ற இளைஞர் கடுமையாகப் பாதிக்கப்பட்டுள்ளார். கடந்த அக்டோபர் 3ஆம் தேதி நள்ளிரவில் வேலையை முடித்துவிட்டு வீடு திரும்பிய அவரிடம், காவல்துறை காரணமின்றி விசாரணை என்ற பெயரில் அராஜகத்தில் ஈடுபட்டுள்ளது. ‘மிஷன் சபுத்ரா’ என்ற நடவடிக்கையின் கீழ் மேற்கொள்ளப்பட்டதாகக் கூறப்படும் இந்தத் தாக்குதலில், ஃபயாஸ் எந்தவித தவறும் செய்யவில்லை என்று விளக்கமளித்தும் காதுகொடுத்துக் கேட்காமல் அவரைத் தடியால் இரத்தம் வரும் வரை கண்மூடித்தனமாகத் தாக்கியுள்ளனர்.
இந்த மனிதாபிமானமற்ற செயலால் படுகாயமடைந்த ஃபயாஸை அவரது குடும்பத்தினர் உடனடியாக மருத்துவமனைக்கு அழைத்துச் சென்று அவசர சிகிச்சையளித்தனர். காவல் துறையினரின் இந்தச் சட்டவிரோத வன்முறைச் செயலைக் கண்டித்தும், தாக்குதல் நடத்தியவர்கள் மீது உரிய நடவடிக்கை கோரியும் அவரது குடும்பத்தினர் காவல் நிலையத்திற்குப் புகார் அளிக்கச் சென்றுள்ளனர். ஆனால், காவல்துறையினர் பாதிக்கப்பட்டவர்களின் புகாரைப் பதிவு செய்ய மறுத்து, வழக்கை மூடிமறைக்க முயல்வதாகவும் குற்றச்சாட்டுகள் எழுந்துள்ளன.
https://twitter.com/pulsenewsbreak/status/2112485388858327435/video/1
சாதாரண பொதுமக்களைப் பாதுகாக்க வேண்டிய காவல்துறையே இப்படி இரக்கமின்றி நடந்து கொள்வது பொதுமக்கள் மத்தியில் பெரும் அதிர்ச்சியையும் கொந்தளிப்பையும் ஏற்படுத்தியுள்ளது. இச்சம்பவம் குறித்து உயர்மட்ட விசாரணை நடத்தி, ஃபயாஸுக்கு நீதி வழங்க வேண்டும் என்றும், தவறிழைத்த காவல்துறை அதிகாரிகள் மீது கடுமையான துறைசார் நடவடிக்கை எடுக்கப்பட வேண்டும் என்றும் மனித உரிமை ஆர்வலர்களும் பொதுமக்களும் கோரிக்கை விடுத்துள்ளனர்.