“இனியும் தாமதித்தால் ஆபத்து!”.. தமிழக அரசுக்கு பா.ம.க. தலைவர் அன்புமணி விடுத்த அதிரடி எச்சரிக்கை..!!

தமிழ்நாட்டில் உள்ள பல்கலைக்கழகங்களின் வேந்தர்களாக முதலமைச்சரே இருக்க வேண்டும் என்ற முந்தைய திமுக அரசின் நிலைப்பாட்டை, தற்போதைய த.வெ.க. அரசு ஏற்க வேண்டிய கட்டாயமில்லை என்ற உயர்கல்வித்துறை அமைச்சர் விஸ்வநாதனின் கூற்றுக்கு பா.ம.க. தலைவர் அன்புமணி ராமதாஸ் கடும் அதிர்ச்சியையும் எதிர்ப்பையும் தெரிவித்துள்ளார். முந்தைய திமுக ஆட்சியில் பல்கலைக்கழகங்களின் வேந்தராக முதலமைச்சரை நியமிக்கக் கோரி நிறைவேற்றப்பட்ட 10 சட்ட முன்வரைவுகளுக்கு ஆளுநர் ஒப்புதல் அளிக்காத நிலையில், உச்சநீதிமன்றம் தனது சிறப்பு அதிகாரத்தைப் (பிரிவு 142) பயன்படுத்தி அதற்கு ஒப்புதல் அளித்துள்ளது. இதன் மூலம் தற்போதைய சூழலில் தமிழக பல்கலைக்கழகங்களின் வேந்தர் முதலமைச்சர் தான் என்பதில் எந்த ஐயமும் இல்லை என்று அவர் தெளிவுபடுத்தியுள்ளார்.

சென்னை உயர்நீதிமன்றத்தின் விடுமுறைக்கால அமர்வு இந்த சட்டங்களுக்கு இடைக்காலத் தடை விதித்திருந்த போதிலும், உச்சநீதிமன்றம் அந்தத் தடையைச் செல்லாது என தீர்ப்பளித்து, இந்த வழக்கை 6 வாரங்களுக்குள் விசாரித்து முடிக்குமாறு உயர்நீதிமன்றத்திற்கு ஆணையிட்டுள்ளது. இத்தகைய சட்டப்பூர்வமான சூழலில், தற்போதைய தமிழக அரசு செய்ய வேண்டியதெல்லாம் உயர்நீதிமன்றத்தில் நிலுவையில் உள்ள இந்த வழக்கை விரைந்து முடித்து, சட்டத்தை முழுமையாக நடைமுறைக்குக் கொண்டு வருவதுதான். அவ்வாறு செய்வதன் மூலம் மட்டுமே பல்கலைக்கழகங்களுக்குத் தேவையான துணைவேந்தர்களை எவ்விதத் தாமதமும் இன்றி விரைவாக நியமிக்க முடியும் என அன்புமணி சுட்டிக்காட்டியுள்ளார்.

சட்டமன்றத்தின் வாயிலாகவும், உச்சநீதிமன்றத் தீர்ப்பின் மூலமும் நிலைநாட்டப்பட்ட “பல்கலைக்கழகங்களின் வேந்தர் முதலமைச்சர் தான்” என்ற தமிழ்நாட்டின் உரிமையை மாற்றியமைக்கப் புதிய அரசு எந்தவொரு முயற்சியையும் செய்யக் கூடாது என்று அவர் வலியுறுத்தியுள்ளார். மாநில உரிமைகளைப் பாதுகாக்கும் இந்த நிலைப்பாட்டிலிருந்து புதிய அரசு பின்வாங்கினால், அது ஒட்டுமொத்த தமிழக அரசின் உரிமைகளையும் தாரை வார்ப்பதற்குச் சமமாக அமைந்துவிடும் என்றும் தனது அறிக்கையில் பா.ம.க. தலைவர் அன்புமணி ராமதாஸ் எச்சரித்துள்ளார்.