2026 தமிழக சட்டமன்றத் தேர்தல் நெருங்கி வரும் வேளையில், பாட்டாளி மக்கள் கட்சியின் நிறுவனரான மருத்துவர் ராமதாஸ், பிரதமர் நரேந்திர மோடியைச் சந்திக்கப் போவதாக எழுந்துள்ள செய்திகள் அரசியல் வட்டாரத்தில் பெரும் பரபரப்பை ஏற்படுத்தியுள்ளன. இது குறித்து செய்தியாளர்கள் எழுப்பிய கேள்விக்கு, சேலம் மேற்கு தொகுதி பாமக எம்எல்ஏ அருள் விளக்கம் அளித்துள்ளார். பிரதமர் மோடிக்கு ராமதாஸ் மீது மிகுந்த மரியாதை உள்ளதாகவும், அவ்வாறு அவர்கள் சந்திப்பு நடத்தினால் அதில் என்ன தவறு இருக்க முடியும் என்றும் அவர் கேள்வி எழுப்பியுள்ளார்.
தற்போதைய அரசியல் சூழலில், அதிமுக கூட்டணியில் அன்புமணி ராமதாஸ் தலைமையிலான பாமக இணைந்துள்ள நிலையில், ராமதாஸ் தலைமையிலான தரப்பு யாருடன் கூட்டணி அமைக்கும் என்ற எதிர்பார்ப்பு நிலவுகிறது. ராமதாஸ் தரப்பு திமுகவுடன் இணையக்கூடும் என்று முதலில் எதிர்பார்க்கப்பட்டது. இருப்பினும், விடுதலைச் சிறுத்தைகள் கட்சித் தலைவர் திருமாவளவனுக்கு திமுக முக்கியத்துவம் அளிப்பதாலும், வன்னியர் சமூக வாக்குகள் அதிமுக பக்கம் செல்ல வாய்ப்புள்ளதாகக் கருதப்படுவதாலும், திமுக தரப்பிலிருந்து இதற்கான சாதகமான சிக்னல் எதுவும் கிடைக்கவில்லை என்று கூறப்படுகிறது.
இந்த இழுபறி நிலைக்கு இடையே பேசிய எம்எல்ஏ அருள், ராமதாஸ் தலைமையிலான பாமகவை தங்கள் கூட்டணியில் இணைக்கப் பல கட்சிகள் ஆர்வம் காட்டி வருவதாகத் தெரிவித்தார். குறிப்பாக, பாஜக கூட்டணியில் இணையுமாறு தங்களுக்குத் தொடர்ந்து அழுத்தங்கள் கொடுக்கப்பட்டு வருவதாகவும், ராமதாஸ் தரப்புடன் கூட்டணி அமைத்தால் மட்டுமே வெற்றி நிச்சயம் என்பதை அனைத்து கட்சிகளும் உணர்ந்துள்ளதாகவும் அவர் குறிப்பிட்டார். மேலும், பாமகவை உருவாக்கியவர் ராமதாஸ் என்பதால், ‘மாம்பழம்’ சின்னம் தங்களுக்கே கிடைக்கும் என்பதில் அவர் உறுதியாக இருந்தார்.
கூட்டணி குறித்த இறுதியான முடிவை எடுக்கும் முழு அதிகாரம் ராமதாஸ் வசமே உள்ளது என்று குறிப்பிட்ட அருள், பிரதமர் மோடியும் ராமதாஸும் சந்திப்பார்களா என்பது தமக்குத் தெரியாது என்று கூறினார். இருப்பினும், மார்ச் மாதத்தின் முதல் இரண்டு வாரங்களில் பிரதமர் மோடி மதுரை, வேலூர் மற்றும் திருச்சி என மூன்று முறை தமிழகத்திற்கு வருகை தர உள்ளார். பிரதமரின் இந்த பயணங்களின் போது தமிழகத்தில் தேசிய ஜனநாயகக் கூட்டணி (NDA) ஒரு முழுமையான வடிவத்தைப் பெறும் என்றும், அப்போது பாமகவின் நிலைப்பாடு தெளிவாகும் என்றும் அரசியல் நோக்கர்கள் கருதுகின்றனர்.