விஜய் அரசுக்கு வந்த முதல் பெரிய சோதனை.. ரூ.3,500 கோடி நிதியை தவெக அரசு வாங்குமா? இல்லையா?… வைகோ கொடுத்த வார்னிங்….!

மத்திய அரசின் பி.எம்.ஸ்ரீ (PM SHRI) கல்வித் திட்டம், தமிழக அரசியல் களத்தில் தற்போது பெரும் புயலைக் கிளப்பியுள்ளது. புதிய கல்விக் கொள்கையின் (NEP 2020) ஒரு பகுதியாக, மும்மொழிக் கொள்கையை மறைமுகமாக வலியுறுத்தும் இத்திட்டத்தை ஏற்குமாறு மத்திய அரசு தொடர்ந்து அழுத்தம் கொடுத்து வருகிறது. முந்தைய திமுக ஆட்சியில் இதற்கு கடுமையான எதிர்ப்பு தெரிவிக்கப்பட்டதால், தமிழகத்திற்கு வரவேண்டிய சுமார் ரூ. 3,500 கோடி சமக்ர சிக்ஷா அபியான் நிதி மத்திய அரசால் நிறுத்தி வைக்கப்பட்டிருந்தது. தற்போது தமிழகத்தில் விஜய் தலைமையிலான தமிழக வெற்றிக் கழகத்தின் (தவெக) புதிய அரசு பொறுப்பேற்றுள்ள சூழலில், நிறுத்தி வைக்கப்பட்ட அந்த நிதியைப் பெறுவதற்காக புரிந்துணர்வு ஒப்பந்தத்தில் கையெழுத்திடுமாறு மத்திய அரசு மீண்டும் கடிதம் அனுப்பியுள்ளது தமிழக அரசியலில் பெரும் பரபரப்பை ஏற்படுத்தியுள்ளது.

இந்த விவகாரத்தில் தமிழக அரசின் நிலைப்பாட்டை அண்மையில் தெளிவுபடுத்திய கல்வித்துறை அமைச்சர் ராஜ்மோகன், மாணவர்களின் வருகையையும் கல்வித் தரத்தையும் உயர்த்துவதே தவெக அரசின் முதன்மை நோக்கம் என்று குறிப்பிட்டார். அதே நேரத்தில், தமிழகத்தின் பாரம்பரியமிக்க இருமொழிக் கொள்கையில் எவ்வித சமரசமும் செய்துகொள்ளும் பேச்சுக்கே இடமில்லை என்றும், மத்திய அரசின் எந்தவொரு நிதி நெருக்கடிக்கும் அல்லது அழுத்தத்திற்கும் தமிழக அரசு அடிபணியாது என்றும் அவர் அதிரடியாகத் தெரிவித்துள்ளார். அமைச்சரின் இந்த உறுதியான பேச்சு தவெக அரசின் கொள்கை பிடிப்பை வெளிப்படுத்திய போதிலும், இத்திட்டம் குறித்து அரசு மறுபரிசீலனை செய்ய வேண்டும் என்று பாஜக மூத்த தலைவர் தமிழிசை சவுந்தராஜன் வலியுறுத்தியுள்ளார். புதிய கல்விக் கொள்கை பல லட்சக்கணக்கான கல்வியாளர்களின் ஆலோசனையின் பேரில் உருவானது என்றும், முதல்வர் விஜய் இதில் தனி கவனம் செலுத்த வேண்டும் என்றும் அவர் கேட்டுக்கொண்டுள்ளார்.

மறுபுறம், தமிழகத்தின் அடிநாதமான மொழி உணர்வையும் சமூகநீதியையும் காக்க, தவெக அரசு இத்திட்டத்தை முற்றிலுமாக நிராகரிக்க வேண்டும் என்ற கோரிக்கை எதிர்க்கட்சிகளிடையே வலுத்து வருகிறது. விசிக தலைவர் திருமாவளவன் மற்றும் இடதுசாரி தலைவர்கள் இத்திட்டத்தை நீண்டகாலமாக எதிர்த்து வரும் நிலையில், தற்போது மதிமுக பொதுச்செயலாளர் வைகோவும் முதலமைச்சர் விஜய்க்கு முக்கிய வேண்டுகோள் ஒன்றை விடுத்துள்ளார். பி.எம்.ஸ்ரீ திட்டம் என்பது இந்தி திணிப்பிற்கான ஒரு நுழைவாயில் என்று எச்சரித்துள்ள வைகோ, தவெக அரசு ஒரு மக்கள் அரசாகத் திகழ வேண்டுமானால் இத்திட்டத்தை ஒருபோதும் ஏற்றுக்கொள்ளக் கூடாது என்றும், மாநில உரிமைகளைக் காக்கும் முதலமைச்சர் விஜய்யின் முடிவுக்கு தமிழ் உணர்வாளர்கள் என்றும் அரணாகத் தோள் கொடுப்பார்கள் என்றும் குறிப்பிட்டுள்ளார்.

மத்திய அரசின் நிதி நெருக்கடி ஒருபுறம் இருந்தாலும், மாநிலத்தின் கல்வித் தன்னாட்சியையும், மொழி உரிமையையும் எக்காரணம் கொண்டும் விட்டுக்கொடுக்கக் கூடாது என்பதே சமூக ஆர்வலர்களின் ஒருமித்த கருத்தாக உள்ளது. முந்தைய அரசு காட்டிய அதே உறுதியை, தற்போதைய தவெக அரசும் காட்டி இருமொழிக் கொள்கையைச் சிதைக்கும் முயற்சிகளை முறியடிக்க வேண்டும் என்று ஒட்டுமொத்த தமிழகமும் எதிர்பார்க்கிறது. மத்திய அரசின் இந்த தொடர் அழுத்தங்களையும், நிதித் தடையையும் முதலமைச்சர் விஜய் தனது அரசியல் சாணக்கியத்தனத்தால் எவ்வாறு எதிர்கொண்டு தமிழகத்தின் கல்வி எதிர்காலத்தை வழநடத்தப் போகிறார் என்பதைப் பொறுத்திருந்தே பார்க்க வேண்டும்.