தமிழ்நாட்டில் ரேஷன் கார்டு வைத்திருப்பவர்கள் கவனிக்க வேண்டிய மிக முக்கியமான காலக்கெடு குறித்த செய்தி வெளியாகியுள்ளது. தேசிய உணவு பாதுகாப்புச் சட்டத்தின் கீழ் முன்னுரிமை மற்றும் அந்த்யோதயா குடும்ப அட்டைகளில் பெயர் உள்ள உறுப்பினர்கள் அனைவரும், தங்களது கைவிரல் ரேகையை (e-KYC) பதிவு செய்வது கட்டாயமாக்கப்பட்டுள்ளது. வரும் மார்ச் 25-ஆம் தேதி இதற்கான கடைசி நாளாக அறிவிக்கப்பட்டுள்ளதால், இன்னும் இரண்டு நாட்களுக்குள் இந்த நடைமுறையை முடிக்க வேண்டிய கட்டாயம் பொதுமக்களுக்கு ஏற்பட்டுள்ளது.
இந்த கைவிரல் ரேகை பதிவை மேற்கொள்ளாதவர்களின் பெயர்கள் ரேஷன் கார்டில் இருந்து நீக்கப்பட வாய்ப்புள்ளதாக அதிகாரிகள் எச்சரிக்கின்றனர். அவ்வாறு பெயர் நீக்கப்பட்டால், அந்த உறுப்பினருக்கு வழங்கப்பட வேண்டிய அரிசி உள்ளிட்ட அத்தியாவசியப் பொருட்களின் அளவு குறையும். தற்போது தேர்தல் நடத்தை விதிமுறைகள் அமலில் இருப்பதால், குறைத்தீர்ப்பு முகாம்கள் ஜூன் மாதம் வரை நடைபெறாது. எனவே, பெயர் நீக்கம் போன்ற சிக்கல்கள் ஏற்பட்டால் அதை சரிசெய்ய நீண்ட காலம் காத்திருக்க வேண்டியிருக்கும் என்பதால், இப்போதே பதிவு செய்வது அவசியமாகும்.
வேலை அல்லது இதர காரணங்களுக்காக வெளியூர் அல்லது வெளிமாநிலங்களில் தங்கியிருப்பவர்கள் தங்கள் சொந்த ஊருக்குச் செல்ல வேண்டிய அவசியமில்லை. ‘ஒரே நாடு ஒரே ரேஷன் கார்டு’ திட்டத்தின் கீழ், அவர்கள் தற்போது தங்கியிருக்கும் இடத்திற்கு அருகிலுள்ள எந்தவொரு நியாயவிலைக் கடைக்கும் சென்று தங்களது அசல் ரேஷன் கார்டைக் காட்டி கைவிரல் ரேகையைப் பதிவு செய்து கொள்ளலாம். இந்த வசதி பொதுமக்களின் சிரமத்தைக் குறைக்க வழிவகை செய்கிறது.
கால அவகாசம் நீட்டிக்கப்படுமா என்பது குறித்து இதுவரை அதிகாரப்பூர்வ அறிவிப்புகள் ஏதும் வரவில்லை. எனவே, கடைசி நேர நெருக்கடியைத் தவிர்க்கவும், தடையின்றி ரேஷன் பொருட்களைப் பெறவும் பொதுமக்கள் மார்ச் 25-க்குள் தங்களது கைவிரல் ரேகையை அருகிலுள்ள ரேஷன் கடைகளில் பதிவு செய்து கொள்ள வேண்டும் என மாவட்ட நிர்வாகங்கள் அறிவுறுத்தியுள்ளன.