எம்.ஜி.ஆர். வரலாறு தெரியுமா..? அன்று அவருக்கும் தனி பாதுகாவலர்கள் இருந்தார்கள்.. அதுபோல் இன்று விஜய்க்கு… தவெக தரமான பதிலடி..!!

முதல்வர் விஜய்க்கு காவல்துறையின் உயர் பாதுகாப்பு இருக்கும் போது, அவர் ஏன் தனியாகத் தனி பாதுகாவலர்களை (Personal Bodyguards) வைத்துள்ளார் என்று அ.தி.மு.க. முன்னாள் எம்.எல்.ஏ.வும் தற்போதைய எம்.பி.யுமான இன்பதுரை கேள்வி எழுப்பியிருந்தார். இப்புகாருக்குப் பதிலடி கொடுத்துள்ள, அ.தி.மு.க.-விலிருந்து விலகி தவெக-வில் இணைந்துள்ள முன்னாள் எம்.எல்.ஏ. சரவணன், அ.தி.மு.க.வின் சரித்திரத்தையே சுட்டிக்காட்டியுள்ளார். அ.தி.மு.க. நிறுவனரான எம்.ஜி.ஆர். கடந்த 1977-ல் முதல்வராகப் பொறுப்பேற்றது முதல் 1987-ல் அவர் மறையும் வரை கே.பி.ராமகிருஷ்ணன், எம்.கே.தர்மலிங்கம் உள்ளிட்டோரைத் தனது தனிப்பட்ட பாதுகாவலர்களாக வைத்திருந்தார் என்றும், எந்தவொரு பொது நிகழ்ச்சியாக இருந்தாலும் இவர்களில் ஒருவரே எம்.ஜி.ஆரின் மிக அருகில் இருப்பார் என்றும் அவர் விளக்கியுள்ளார்.

எம்.ஜி.ஆர். தனது பாதுகாப்பிற்கு அரசுப் பாதுகாப்பை விடவும், இத்தகைய தனிப்பட்ட பாதுகாவலர்களுக்கே எப்போதும் முன்னுரிமை தந்தார் என்பதை ‘எம்.ஜி.ஆர். ஒரு சகாப்தம்’ என்ற நூலிலேயே கே.பி.ராமகிருஷ்ணன் தெளிவாக எழுதியுள்ளார் என்று சரவணன் சுட்டிக்காட்டியுள்ளார். மேலும், முதலமைச்சர் அல்லது அமைச்சராகப் பொறுப்பில் உள்ள ஒருவர் தங்களுக்குத் தேவைப்படும் பட்சத்தில், வெளியாட்களைத் தங்களின் தனிப்பட்ட பாதுகாப்பிற்கு நியமித்துக் கொள்ள அரசு விதிகள் முழுமையாக அனுமதிக்கின்றன என்பதை அ.தி.மு.க.வினர் நினைவில் கொள்ள வேண்டும் என்றும் அவர் தவெக தரப்பில் இருந்து தனது காரசாரமான பதிலடியைப் பதிவு செய்துள்ளார்