டிஜிட்டல் இந்தியாவில் இப்படியா?… ஆம்புலன்ஸ் வர முடியாததால் உருளும் பீப்பாயில் சடலம்… உயிரிழந்த பின்னும் தொடரும் நரகம்…!!

மத்தியப் பிரதேச மாநிலம் ரேவா மாவட்டத்தில் உள்ள ஜாவா பகுதியில் நெஞ்சை உலுக்கும் சம்பவம் ஒன்று அரங்கேறியுள்ளது. அப்பகுதியில் பெய்த பலத்த மழையால் சாலைகள் முழுவதும் வெள்ளக்காடாக காட்சியளிக்கின்றன. முறையான போக்குவரத்து மற்றும் சாலை வசதிகள் இல்லாத காரணத்தால், ஆம்புலன்ஸ் வாகனம் அந்த கிராமத்திற்குச் செல்ல முடியவில்லை. இதனால், இறந்த ஒருவரின் உடலை எடுத்துச் செல்ல வழியின்றி தவித்த கிராம மக்கள், இரண்டு பெரிய டிரம்களை ஒன்றாகக் கட்டி, அதன் மீது உடலை வைத்து ஆபத்தான முறையில் வெள்ளத்தைக் கடந்து வீட்டை அடைந்தனர்.

இந்த அவலநிலை குறித்து அப்பகுதி மக்கள் கடும் வேதனையும் அதிருப்தியும் தெரிவித்துள்ளனர். சேதமடைந்த சாலைகள் மற்றும் அடிப்படை வசதிகள் இல்லாதது குறித்து பலமுறை புகார் அளித்தும் எந்தவித நடவடிக்கையும் எடுக்கப்படவில்லை என்று அவர்கள் குற்றம் சாட்டுகின்றனர். மேலும், உள்ளூர் கிராமப் பஞ்சாயத்து தலைவர் தனது அரசியல் செல்வாக்கைக் காட்டி, மக்கள் வாழ்ந்தாலும் வீழ்ந்தாலும் தமக்கு எந்தக் கவலையும் இல்லை என மிகவும் அலட்சியமாகப் பதிலளித்ததாகவும் கிராம மக்கள் வேதனையுடன் கூறியுள்ளனர்.

ரேவா மாவட்டத்தில் இதுபோன்ற சம்பவங்கள் நடப்பது இது முதல் முறையல்ல. ஒரு மாதத்திற்கு முன்பு ஜூலை மாதத்தில், இதே மாவட்டத்தில் முறையான சாலை வசதி மற்றும் ஆம்புலன்ஸ் இல்லாததால், உடல்நலம் பாதிக்கப்பட்ட பழங்குடியினப் பெண் ஒருவரை மருத்துவமனைக்குக் கட்டிலில் சுமந்து சென்றனர்; ஆனால் அவர் சிகிச்சை கிடைக்காமல் வழியிலேயே பரிதாபமாக உயிரிழந்தார். தொடர்ந்து நடைபெறும் இதுபோன்ற சம்பவங்கள், கிராமப்புறங்களில் இன்னும் அடிப்படை வசதிகள் கூடச் சென்றடையாத மோசமான நிலையை அப்பட்டமாகக் காட்டுகின்றன.