தமிழக அரசியலில் பெரும் பரபரப்பை ஏற்படுத்தியுள்ள 2026 சட்டமன்றத் தேர்தலை முன்னிட்டு, தேசிய ஜனநாயக கூட்டணியில் (NDA) த.வெ.க தலைவர் விஜய்யை இணைக்க தீவிர முயற்சிகள் மேற்கொள்ளப்பட்டு வருகின்றன. இதன் ஒரு பகுதியாக, ஆந்திர துணை முதல்வர் பவன் கல்யாண், நடிகர் விஜய்யுடன் தொலைபேசியில் தொடர்பு கொண்டு ஆலோசனை நடத்தியதாகத் தகவல்கள் தெரிவிக்கின்றன. தனித்து நின்று வெற்றி பெறுவது கடினம் என்பதை தனது சொந்த அனுபவத்தின் மூலம் பவன் கல்யாண் விஜய்க்கு அறிவுறுத்தியுள்ளார்.
தனது அரசியல் பயணத்தின் ஆரம்பத்தில் தனித்து நின்று தோல்வியைச் சந்தித்ததையும், தேசிய கூட்டணியுடன் இணைந்த பின்னரே ஆந்திராவில் அதிகாரம் மற்றும் வெற்றி சாத்தியமானது என்பதையும் பவன் கல்யாண் சுட்டிக்காட்டியுள்ளார். குறிப்பாக, அவரது சகோதரரும் மெகா ஸ்டாருமான சிரஞ்சீவி, கூட்டணி இன்றி அரசியல் செய்ததால் ஏற்பட்ட சறுக்கல்களை உதாரணமாகக் கூறி, அத்தகைய தவறை விஜய் செய்துவிடக் கூடாது என்று அவர் வலியுறுத்தியதாகக் கூறப்படுகிறது. இந்த ‘சிரஞ்சீவி சென்டிமெண்ட்’ விஜய்யின் முடிவில் தாக்கத்தை ஏற்படுத்தக்கூடும் என அரசியல் வட்டாரங்கள் கருதுகின்றன.
இதற்கிடையில், டெல்லி மேலிடம் விஜய்யை தங்கள் பக்கம் இழுக்க பல்வேறு முயற்சிகளை மேற்கொண்டு வருகிறது. கூட்டணிக்கு வந்தால் 65 தொகுதிகள் மற்றும் மத்திய அரசின் ஆதரவு வழங்கப்படும் என்ற ‘பம்பர் ஆஃபர்’ ஒருபுறம் முன்வைக்கப்பட்டுள்ளது. அதே சமயம், கூட்டணிக்கு மறுத்தால் பழைய வழக்குகள் தூசி தட்டப்படும் என்ற மறைமுக எச்சரிக்கையும் விடுக்கப்பட்டுள்ளதாக அரசியல் களத்தில் பரபரப்பான பேச்சு எழுந்துள்ளது. இதனால், விஜய் கடும் நெருக்கடிக்கு ஆளாகியுள்ளார்.
எதிர்க்கட்சி வாக்குகளைப் பிரிப்பதன் மூலம் தங்களுக்கு பாதிப்பு ஏற்படக்கூடாது என்பதில் பாஜக உறுதியாக இருப்பதால், இந்த கூட்டணி விவகாரம் த.வெ.க-விற்கு பெரும் சவாலாக மாறியுள்ளது. ஒருபுறம் பவன் கல்யாணின் ஆலோசனை, மறுபுறம் டெல்லியின் அழுத்தம் என இரட்டை நெருக்கடியில் சிக்கியுள்ள விஜய், மார்ச் 10-ஆம் தேதிக்குப் பிறகு எடுக்கப்போகும் முடிவு தமிழக அரசியலில் மிகப்பெரிய மாற்றத்தை ஏற்படுத்தும் என்று எதிர்பார்க்கப்படுகிறது.