தமிழ் திரையுலகில் “இயக்குநர் இமயம்” என்று போற்றப்படும் மூத்த இயக்குநர் பாரதிராஜா (84), வயது மூப்பு மற்றும் உடல்நலக்குறைவு காரணமாக இன்று அதிகாலை 2 மணியளவில் காலமானார். சென்னை நீலாங்கரையில் உள்ள அவரது இல்லத்தில் வைக்கப்பட்டிருக்கும் அவரது திருவுடலுக்கு, முதலமைச்சர் விஜய் நேரில் சென்று மலர் வளையம் வைத்து அஞ்சலி செலுத்தியுள்ளார். கிராமியக் கதைகளையும், மண்வாசனை மாறாத வாழ்வியலையும் தமிழ் சினிமாவில் புரட்சிகரமாகப் பதிவு செய்த ஒரு மகா கலைஞனின் மறைவு, ஒட்டுமொத்தத் திரையுலகையும், ரசிகர்களையும் ஆழமான சோகத்தில் ஆழ்த்தியுள்ளது.
மறைந்த இயக்குநர் பாரதிராஜாவின் உடலுக்குப் பொதுமக்களும், திரையுலகப் பிரபலங்களும் கண்ணீர் அஞ்சலி செலுத்தி வருகின்றனர். குறிப்பாக, நாம் தமிழர் கட்சியின் தலைமை ஒருங்கிணைப்பாளர் சீமான், பிரபல இயக்குநர் கங்கை அமரன் மற்றும் பல முக்கியத் திரை நட்சத்திரங்கள் நேரில் வந்து தங்களது ஆழ்ந்த இரங்கலைத் தெரிவித்துள்ளனர். 16 வயதினிலே, முதல் மரியாதை போன்ற காலத்தால் அழியாத காவியங்களைப் படைத்த இமயம் சரிந்த செய்தி அறிந்து, உலகெங்கிலும் உள்ள தமிழ் நெஞ்சங்கள் சமூக வலைதளங்கள் வாயிலாகத் தங்களின் அஞ்சலியைப் பகிர்ந்து வருகின்றனர்