நண்பன் படத்தை நான்தான் இயக்க வேண்டும் என ஆசைப்பட்டார் விஜய்.. ஷங்கர் வந்தது எப்படி? – பார்த்திபன் பகிர்ந்த ஆச்சர்ய தகவல்!

தமிழ் சினிமாவில் முக்கியமான இயக்குனராகவும் நடிகராகவும் 30 ஆண்டுகளுக்கு மேலாக வரும் வருகிறார். அவர் தான் இயக்கி நடித்த புதிய பாதை என்ற வெற்றிப் படத்தின் மூலம் தமிழ் சினிமா உலகில் நுழைந்தார். அதற்கு முன்னர் இயக்குனர் பாக்யராஜிடம் உதவி இயக்குனராக பணியாற்றினார்.

புதிய பாதை படத்தில் அப்போது முன்னணி நடிகையாக இருந்த சீதாவைக் கதாநாயகியாக நடிக்க வைத்தார். அந்த படத்தின் உருவாக்கத்தின் போது இருவரும் காதலில் விழுந்தனர். அதன் பின்னர் பெற்றோர் எதிர்ப்பை மீறி இருவரும் திருமணம் செய்துகொண்டனர். திருமணத்துக்குப் பிறகு நடிப்பைக் குறைத்துக் கொண்டார் சீதா. ஆனால் பார்த்திபன் நடிகராகவும் இயக்குனராகவும் தொடர்ந்து செயல்பட்டு வருகிறார்.

அவரின் இந்த பயணத்தில் பல ஏற்ற இறக்கங்களை சந்தித்துள்ளார் பார்த்திப்ன. நடிகராக சம்பாதிக்கும் பணத்தை இயக்குனராகவும், தயாரிப்பாளராகவும் முதலீடு செய்து வித்தியாசமான படங்களை இயக்கி கையை சுட்டுக் கொள்கிறார். இப்போது அவர் சிறுவர்களை வைத்து டீன்ஸ் என்ற படத்தை இயக்கி அதை இந்தியன் 2 ரிலீஸ் ஆகும் நாளில் ரிலீஸ் செய்யவுள்ளார்.

இதையடுத்து படத்தின் ப்ரமோஷனுக்காக அவர் பல யுடியூப் சேனல்களில் நேர்காணல்கள் அளித்து வருகிறார். அதில் தன்னுடைய திரைவாழ்க்கையில் சந்தித்த சுவாரஸ்யமான தகவல்களைப் பகிர்ந்துள்ளார். அதில் ஏன் முன்னணி நடிகர்களை வைத்து படம் இயக்கவில்லை என்ற கேள்விக்கு பதிலளித்தார்.

அதில் “சூர்யாவோடு படம் இயக்க ஒருமுறை பேச்சுவார்த்தை நடந்தது. ஆனால் அது அடுத்த கட்டத்துக்கு செல்லவில்லை. விஜய்யை ஆரம்ப காலகட்டங்களில் என் படத்தில் நடிக்க வைக்க அவரின் அப்பா கேட்டார். அதே போல அழகிய தமிழ் மகன் படத்தில் விஜய் பேசுவது போல இருக்கும் கவிதைகளை நான்தான் எழுதித் தந்தேன். அதை விஜய்தான் என்னிடம் கேட்க சொன்னாராம்.

அதே போல 3 இடியட்ஸ் படத்தை ரீமேக் செய்த போது, அந்த படத்தை நான்தான் இயக்கவேண்டும் என விஜய் ஆசைப்பட்டார். ஆனால் தயாரிப்பாளர்கள் ஷங்கர் வந்தால் பிஸ்னஸ் அதிகமாகும் என முடிவெடுத்தார்கள். அது சரியான முடிவுதான். நானே அந்த முடிவைதான் எடுப்பேன்” எனக் கூறியுள்ளார்.