ஓபிஎஸ் கூடாரம் காலி?…. பண்ருட்டியார் தொடங்கும் ‘எம்.ஜி.ஆர் அண்ணா திமுக’…. ஆடிப்போய் கிடக்கும் அரசியல் களம்….!

தமிழக சட்டமன்றத் தேர்தல் நெருங்கி வரும் வேளையில், மாநில அரசியலில் ஒரு முக்கிய திருப்பமாக, முன்னாள் அமைச்சரும் மூத்த அரசியல் தலைவருமான பண்ருட்டி ராமச்சந்திரன் புதிய கட்சி தொடங்க உள்ளதாகத் தகவல்கள் வெளியாகியுள்ளன. எம்.ஜி.ஆர் காலத்து அரசியல் ஜாம்பவானாகக் கருதப்படும் இவர், தற்போது ஓ. பன்னீர்செல்வத்தின் ‘அதிமுக உரிமை மீட்புக் குழுவின்’ ஆலோசகராகச் செயல்பட்டு வருகிறார். தேர்தல் களம் சூடுபிடித்துள்ள நிலையில், அவரது இந்த திடீர் முடிவு அரசியல் வட்டாரங்களில் பெரும் பரபரப்பை ஏற்படுத்தியுள்ளது.

ஓ. பன்னீர்செல்வத்தின் தலைமையிலான அணி, தேசிய ஜனநாயகக் கூட்டணியில் இருந்து வெளியேறிய பிறகு, அடுத்தகட்ட நகர்வுகள் குறித்துத் தெளிவான முடிவெடுக்காமல் தாமதித்து வந்தது. இதனால் அதிருப்தியடைந்த பல முக்கிய நிர்வாகிகள் மாற்றுத் திறப்புக் கட்சிகளில் இணைந்து வரும் சூழலில், பண்ருட்டி ராமச்சந்திரனும் ஓபிஎஸ் மீதான அதிருப்தியில் இருந்ததாகக் கூறப்படுகிறது. விஜய்யின் தமிழக வெற்றிக் கழகத்தில் அவர் இணையக்கூடும் என்று பரவிய வதந்திகளுக்கு முற்றுப்புள்ளி வைக்கும் விதமாக, அவரே தனிக்கட்சி தொடங்கும் முடிவை எடுத்துள்ளதாகத் தெரிகிறது.

வரும் பிப்ரவரி 19-ஆம் தேதி சென்னையில் நடைபெறவுள்ள நிகழ்ச்சியில், தனது புதிய கட்சியின் பெயரை அவர் அதிகாரப்பூர்வமாக அறிவிக்க உள்ளார். அவரது கட்சிக்கு ‘எம்.ஜி.ஆர் அண்ணா திமுக’ என்று பெயரிடத் திட்டமிட்டுள்ளதாக நம்பத்தகுந்த வட்டாரங்கள் தெரிவிக்கின்றன. ஓபிஎஸ் அணியில் இருக்கும் மேலும் சில முக்கிய நிர்வாகிகள் இந்தப் புதிய கட்சியில் இணைய வாய்ப்புள்ளதாகக் கூறப்படுவதால், அதிமுகவின் இரு அணிகளுமே சற்று கலக்கத்தில் இருப்பதாகத் தெரிகிறது.

நான்கு முனைப் போட்டி நிலவும் தமிழக அரசியலில், பண்ருட்டி ராமச்சந்திரனின் இந்தப் புதிய வரவு எந்த மாதிரியான தாக்கத்தை ஏற்படுத்தும் என்பது எதிர்பார்ப்பை உருவாக்கியுள்ளது. அனுபவம் வாய்ந்த ஒரு மூத்த தலைவர் தேர்தல் நேரத்தில் தனிக்கட்சி தொடங்குவது, வாக்கு வங்கியில் மாற்றங்களை ஏற்படுத்துமா அல்லது வேறு ஏதேனும் கூட்டணியுடன் அவர் கைகோர்ப்பாரா என்பது வரும் பிப்ரவரி 19-ஆம் தேதிக்குப் பிறகு தெளிவாகத் தெரியும்.