வளைகுடா நாடுகளில் நிலவும் போர்ச் சூழலால் சர்வதேச அளவில் கச்சா எண்ணெய் விலை கடுமையாக உயர்ந்துள்ளது, இது பாகிஸ்தானின் பொருளாதாரத்தை நிலைகுலையச் செய்துள்ளது. கச்சா எண்ணெய் இறக்குமதியை மட்டுமே நம்பியிருக்கும் பாகிஸ்தானுக்கு, இது பேரிடியாக அமைந்துள்ளது. ஏற்கனவே பல ஆண்டுகளாகத் தீவிரவாத ஆதரவு மற்றும் ஊழல் போன்ற காரணங்களால் வளர்ச்சிப் பாதையைத் தவறவிட்ட அந்த நாட்டுக்கு, தற்போதைய உலகளாவிய சூழல் எரியும் நெருப்பில் எண்ணெய் ஊற்றுவது போல அமைந்துள்ளது. அந்நியச் செலாவணி கையிருப்பு வெறும் மூன்று மாத இறக்குமதிக்கு மட்டுமே (16.4 பில்லியன் டாலர்) போதுமானதாக இருக்கும் நிலையில், பாகிஸ்தான் ஒரு இக்கட்டான சூழலில் சிக்கியுள்ளது.
இந்த இடியாப்பச் சிக்கலில் மற்றொரு அடியாக, ஐக்கிய அரபு அமீரகம் (UAE) தான் வழங்கிய 3 பில்லியன் டாலர் கடனை உடனடியாகத் திரும்பக் கேட்டு நெருக்கடி கொடுத்துள்ளது. கடந்த ஏழு ஆண்டுகளாக இந்தக் கடனைத் திரும்பக் கேட்காமல் ‘ரோல் ஓவர்’ செய்து வந்த அமீரகம், தற்போது மத்திய கிழக்கில் நிலவும் பதற்றமான சூழலைக் கருத்தில் கொண்டு கறாராகச் செயல்படத் தொடங்கியுள்ளது. வழக்கமாகப் பாகிஸ்தானுக்குத் தோள் கொடுக்கும் வளைகுடா நாடுகள், இந்த முறை தங்கள் நாட்டின் பொருளாதாரப் பாதுகாப்பிற்கே முன்னுரிமை அளிப்பது பாகிஸ்தானைத் தனிமைப்படுத்தியுள்ளது. சுமார் 25,000 கோடி ரூபாயை இப்போதிருக்கும் சூழலில் அமீரகத்திற்குத் திருப்பிக் கொடுத்தால், அது பாகிஸ்தான் கஜானாவையே காலி செய்துவிடும் அபாயம் உள்ளது.
இந்த இக்கட்டான நிலையில் இருந்து தப்பிக்க பாகிஸ்தான் நிதியமைச்சர் முகமது அவுரங்கசீப் பல்வேறு வழிகளைத் தேடி வருகிறார். சீனாவிடம் இருந்து யுவான் கரன்சியில் கடன் பெறும் ‘பண்டா பாண்டுகள்’ (Panda Bonds) மூலம் 250 மில்லியன் டாலர் திரட்டவும், நான்கு ஆண்டுகளுக்குப் பிறகு மீண்டும் சர்வதேசச் சந்தையில் ‘யூரோ பாண்டுகளை’ வெளியிடவும் பாகிஸ்தான் திட்டமிட்டுள்ளது. மேலும், சர்வதேச நாணய நிதியத்திடம் (IMF) இருந்து அடுத்த தவணையாக வர வேண்டிய 1.3 பில்லியன் டாலர் நிதியையே அவர்கள் பெரிதும் மலைபோல நம்பியுள்ளனர். இந்த நிதியைக் கொண்டே அமீரகத்தின் கடனைச் சமாளிக்கலாம் என்பது பாகிஸ்தானின் கணக்காக இருக்கிறது.
இருப்பினும், வாங்கிய கடனை அடைக்க வட்டிக்கு மேல் வட்டி வாங்குவதும், புதிய பாண்டுகளை வெளியிட்டுச் சந்தையை நம்பியிருப்பதும் பாகிஸ்தானை நீண்ட கால அடிப்படையில் திவால் நிலையை நோக்கியே அழைத்துச் செல்கிறது. சீனா மற்றும் சவுதி அரேபியாவுடன் ரகசியப் பேச்சுவார்த்தைகள் ஒருபுறம் நடந்தாலும், தெளிவான பொருளாதாரச் சீர்திருத்தங்கள் இல்லாதவரை பாகிஸ்தான் இந்தப் படுகுழியில் இருந்து மீள்வது கடினம் என்றே தோன்றுகிறது. அண்டை நாடான இந்தியா 697 பில்லியன் டாலர் அந்நியச் செலாவணி கையிருப்புடன் வலுவாக உள்ள நிலையில், பாகிஸ்தான் தனது இருப்புக்கே போராட வேண்டிய நிலைக்குத் தள்ளப்பட்டுள்ளது.