டி20 உலகக் கோப்பையில் இந்தியா உடனான போட்டியைப் புறக்கணிப்பதாகப் பாகிஸ்தான் அரசு முதலில் அறிவித்தது. ஆனால், பாகிஸ்தான் கிரிக்கெட் போர்டு இது தொடர்பாக ஐசிசி-க்கு அதிகாரப்பூர்வமாகத் தெரிவிக்காமல் இருந்தது. மறுபுறம், போட்டியைப் புறக்கணித்தால் கடுமையான நிதி அபராதம் விதிக்கப்படும் என ஐசிசி எச்சரித்தது. இதனால், பாகிஸ்தான் தனது முடிவில் இருந்து பின் வாங்குமா என்ற கேள்வி எழுந்தது.
இதற்கிடையே நேற்று ஐசிசி குழு பாகிஸ்தான் கிரிக்கெட் போர்டு அதிகாரிகளுடன் பேச்சுவார்த்தை நடத்தியது. தொடர்ந்து பாகிஸ்தான் கிரிக்கெட் வாரியத் தலைவர் மொசின் நக்வி, பாகிஸ்தான் பிரதமர் ஷெபாஸ் ஷெரீப் உடன் இதுகுறித்து ஆலோசனை நடத்தினார். இதையடுத்து தனது முடிவை மாற்றிய பாகிஸ்தான் அரசு, இலங்கை அதிபர் மற்றும் வங்கதேச கிரிக்கெட் வாரியத்தின் கோரிக்கைகளை ஏற்று, கிரிக்கெட் விளையாட்டின் நலன் கருதி, இந்தியா உடனான போட்டியில் விளையாட தங்கள் கிரிக்கெட் அணிக்கு அனுமதி வழங்கியுள்ளது.