அமெரிக்காவைச் சேர்ந்த முன்னணி தொழில்நுட்ப நிறுவனமான ஆரக்கிள் (Oracle), தனது விரிவான மறுசீரமைப்பு நடவடிக்கைகளின் ஒரு பகுதியாகப் பல ஊழியர்களைத் திடீரென பணிநீக்கம் செய்து அதிரடி நடவடிக்கை எடுத்துள்ளது. பாதிக்கப்பட்ட ஊழியர்களுக்கு அதிகாலையில் அனுப்பப்பட்ட மின்னஞ்சலில், “இன்றே உங்களின் கடைசி வேலை நாள்” எனக் குறிப்பிடப்பட்டு, அவர்களின் பணியிடங்கள் உடனடியாக ரத்து செய்யப்பட்டுள்ளதாகத் தெரிவிக்கப்பட்டுள்ளது. நடப்பு நிதியாண்டில் மட்டும் சுமார் 21,000 பணியிடங்கள் வரை குறைக்கப்பட்டுள்ளதாகக் கூறப்படும் நிலையில், இந்த திடீர் நடவடிக்கை ஏற்கனவே திட்டமிடப்பட்ட நிறுவன மறுசீரமைப்பின் அடுத்தகட்ட நகர்வாகவே பார்க்கப்படுகிறது.
செயற்கை நுண்ணறிவு (AI) சார்ந்த உள்கட்டமைப்பு மற்றும் அதிநவீன தரவு மையங்களை (Data Centers) விரிவுபடுத்துவதில் ஆரக்கிள் நிறுவனம் தற்பொழுது மிகப்பெரிய அளவில் முதலீடு செய்து வருகிறது. இதனால் நிறுவனத்திற்கு ஏற்பட்டுள்ள நிதிச்சுமையைச் சமநிலைப்படுத்தவும், மாறுபடும் வர்த்தகத் தேவைகளுக்கு ஏற்ப வளங்களை மாற்றியமைக்கவும் இந்த பணிநீக்கங்கள் மேற்கொள்ளப்பட்டு வருகின்றன. இந்த புதிய நடவடிக்கையின் மூலம் எத்தனை ஊழியர்கள் பாதிக்கப்பட்டுள்ளனர் என்ற அதிகாரப்பூர்வ விவரங்களை அந்நிறுவனம் இதுவரை வெளியிடவில்லை என்றாலும், உலகளாவிய தொழில்நுட்பத் துறையில் இது பெரும் பரபரப்பை ஏற்படுத்தியுள்ளது.