யாரோடப்பா கூட்டணி..? “இன்னைக்கு ஒரு முடிவு தெரிஞ்சிரும்” ஓரங்கட்டப்பட்டு ஓபிஎஸ்-ன் ஓவர் சஸ்பென்ஸ்…!

அதிமுகவில் இருந்து நீக்கப்பட்ட பிறகு, ஓ. பன்னீர்செல்வம் அரசியல் அரங்கில் ஓரங்கட்டப்பட்ட நிலையிலேயே காணப்படுகிறார். 2024 மக்களவைத் தேர்தலில் சுயேச்சையாகப் போட்டியிட்டு தோல்வியைச் சந்தித்த நிலையில், பிரதான கட்சிகளான அதிமுக மற்றும் திமுகவில் இருந்து அவருக்குச் சாதகமான அழைப்பு வரவில்லை என்ற விரக்தியில் இருப்பதாகவே தெரிகிறது. அதிமுக தலைமை எடப்பாடி பழனிசாமி வசமாகிவிட்ட நிலையில், ஓபிஎஸ்-ஐ மீண்டும் கட்சியில் சேர்ப்பதற்கு பழனிசாமி உறுதியாக மறுப்பு தெரிவித்து வருகிறார். இதனால், ஓபிஎஸ் தனது ஆதரவாளர்களைத் தக்கவைத்துக்கொள்ளவும், தனது அரசியல் இருப்பை உறுதிப்படுத்திக்கொள்ளவும் தீவிரமாக முயற்சிக்கிறார்.

இந்நிலையில் தேனி மாவட்டம் பெரியகுளத்தில் உள்ள தனது பண்ணை வீட்டில் ஆதரவாளர்களுடன் நடத்தும் ஆலோசனைக் கூட்டம் மிகவும் முக்கியத்துவம் வாய்ந்ததாகப் பார்க்கப்படுகிறது. இந்தக் கூட்டத்தில், தனது ஆதரவாளர்களின் கருத்துகளைக் கேட்டறிந்து, தனது அடுத்தகட்ட அரசியல் முடிவு குறித்துத் தலைநகர் சென்னையில் அறிவிப்பேன் என்று அவர் கூறியுள்ளார். இந்த அறிவிப்பு, அவர் எந்தக் கூட்டணியில் இணைவார் அல்லது வேறு ஏதேனும் புதிய வியூகத்தை வகுப்பாரா என்பதைத் தீர்மானிக்கும்.