ஓபிஎஸ் அணியில் ஏற்பட்டுள்ள அடுத்தடுத்த சரிவுகள் அந்தத் தரப்பினரிடையே பெரும் கலக்கத்தை ஏற்படுத்தியுள்ளது. தூத்துக்குடி வடக்கு மாவட்டச் செயலாளர் கருப்பூர் சீனி தலைமையில், ஒன்றிய மற்றும் நகர செயலாளர்கள் உள்ளிட்ட 200-க்கும் மேற்பட்ட நிர்வாகிகள் விளாத்திகுளம் எம்.எல்.ஏ மார்க்கண்டேயன் முன்னிலையில் தங்களை திமுகவில் இணைத்துக் கொண்டனர். நீண்டகாலமாக ஓபிஎஸ் பக்கம் நின்ற முக்கிய நிர்வாகிகள், தற்போது தொகுதி வாரியாக அணி மாறி வருவது தூத்துக்குடி மாவட்டத்தில் அந்த அணியின் பலத்தை வெகுவாகக் குறைத்துள்ளது.
ஏற்கெனவே முன்னாள் அமைச்சர்கள் மற்றும் மாவட்ட அளவிலான முக்கிய நிர்வாகிகள் அதிமுக, திமுக மற்றும் தமிழக வெற்றிக் கழகம் என வெவ்வேறு கட்சிகளை நோக்கிச் சென்று கொண்டிருக்கின்றனர். ஒரு காலத்தில் செல்வாக்குடன் இருந்த ஓபிஎஸ் தரப்பு, தற்போது இரண்டாம் கட்டத் தலைவர்களின் வெளியேற்றத்தால் கடும் அரசியல் நெருக்கடியைச் சந்தித்து வருகிறது. இந்தத் தொடர் இடப்பெயர்வுகள், வரவிருக்கும் தேர்தல்களில் ஓபிஎஸ் அணியின் இருப்பையே கேள்விக்குறியாக்கும் வகையில் அமைந்துள்ளதாக அரசியல் விமர்சகர்கள் கருதுகின்றனர்.