“தேனியில் ஓபிஎஸ்-க்கு விழுந்த பலத்த அடி”…. 18 கிளைச் செயலாளர்கள் ஒரே நாளில் எடுத்த அதிரடி முடிவு…. யாரும் எதிர்பார்க்காத ட்விஸ்ட்….!

முன்னாள் முதல்வர் ஓ. பன்னீர்செல்வம் அண்மையில் திமுகவில் இணைந்ததைத் தொடர்ந்து, அவரது சொந்த மாவட்டமான தேனியில் அரசியல் களம் பெரும் பரபரப்பைக் கண்டுள்ளது. ஓபிஎஸ்-ன் இந்த அதிரடி முடிவை ஏற்காத அவரது தீவிர ஆதரவாளர்கள் மற்றும் கட்சி நிர்வாகிகள், தற்போது கூண்டோடு விலகி மீண்டும் அதிமுகவில் இணைந்து வருகின்றனர். இது ஓபிஎஸ் தரப்பிற்கு அவரது கோட்டையிலேயே பலத்த பின்னடைவாகக் கருதப்படுகிறது.

தேனி மாவட்டத்தின் பல்வேறு பகுதிகளில் இருந்த ஓபிஎஸ் ஆதரவாளர்கள், எடப்பாடி பழனிசாமி தலைமையிலான அதிமுகவே உண்மையான இயக்கம் எனக் கூறி தங்களை அக்கட்சியில் இணைத்துக் கொண்டுள்ளனர். குறிப்பாக, பெரியகுளம் மற்றும் கடமலைக்குண்டு மயிலாடும்பாறை ஒன்றியத்தைச் சேர்ந்த 18 கிளைச் செயலாளர்கள் உள்ளிட்ட நூற்றுக்கணக்கான நிர்வாகிகள் அதிமுக மாவட்டச் செயலாளர் முன்னிலையில் கட்சியில் இணைந்தனர். ஓபிஎஸ்-ன் தீவிர விசுவாசிகளாக அறியப்பட்டவர்கள் கூட தற்போது அவரிடமிருந்து விலகியுள்ளது குறிப்பிடத்தக்கது.

இந்த கட்சித் தாவல் குறித்துப் பேசிய நிர்வாகிகள், ஜெயலலிதாவின் விசுவாசியாக இருந்த ஓபிஎஸ், கொள்கை முரண்பாடு கொண்ட திமுகவில் இணைந்ததை தங்களால் ஜீரணிக்க முடியவில்லை என்று தெரிவித்துள்ளனர். இதன் அடையாளமாக, பெரியகுளம் உள்ளிட்ட பகுதிகளில் உள்ள தங்களது வீடுகள் மற்றும் அலுவலகங்களில் இருந்த ஓபிஎஸ் புகைப்படங்களை அகற்றிவிட்டு, இபிஎஸ் படங்களை வைத்து தங்களது விசுவாசத்தை வெளிப்படுத்தி வருகின்றனர்.

தேனி மாவட்டத்தில் ஓபிஎஸ்-க்கு இருந்த செல்வாக்கு இந்த அணிமாற்றத்தால் பெருமளவு சரிந்துள்ளதாக அரசியல் விமர்சகர்கள் கருதுகின்றனர். முன்னாள் அமைச்சர் வெல்லமண்டி நடராஜன் மற்றும் ஆர். தர்மர் எம்பி போன்ற முக்கிய புள்ளிகளும் ஏற்கனவே இபிஎஸ் பக்கம் சாய்ந்துள்ள நிலையில், அடிமட்டத் தொண்டர்களும் வெளியேறுவது தேனி மாவட்டத்தில் அதிமுகவை மீண்டும் பலப்படுத்தியுள்ளது. இந்த அதிரடி மாற்றங்கள் வரவிருக்கும் தேர்தல்களில் முக்கியத் திருப்பத்தை ஏற்படுத்தும் என்று எதிர்பார்க்கப்படுகிறது.