ஒரே மேடையில் இபிஎஸ் – ஓபிஎஸ் – டிடிவி…. 2026-ல் காத்திருக்கும் மிகப்பெரிய அரசியல் ட்விஸ்ட்…. டெல்லி கொடுத்த அசைன்மென்ட் சக்சஸ்….!

தமிழக அரசியலில் கடந்த சில ஆண்டுகளாக நீடித்து வந்த அதிமுக உட்கட்சி மோதல், 2026 சட்டமன்றத் தேர்தலை முன்னிட்டு ஒரு முக்கிய திருப்பத்தை எட்டியுள்ளது. எடப்பாடி பழனிசாமியை  தீவிரமாக விமர்சித்து வந்த ஓ. பன்னீர்செல்வம் தற்போது தனது நிலைப்பாட்டை மாற்றிக்கொண்டுள்ளார். அதிமுகவில் மீண்டும் இணையத் தான் தயார் என்றும், இது குறித்த இறுதி முடிவை ‘அண்ணன்’ எடப்பாடி பழனிசாமி தான் எடுக்க வேண்டும் என்றும் அவர் நெகிழ்ச்சியுடன் தெரிவித்துள்ளார். கடந்த 4-5 ஆண்டுகளாக எடப்பாடியைத் துரோகி என்று அழைத்து வந்த ஓபிஎஸ், தற்போது அவரை மீண்டும் அண்ணன் என விளிப்பது அரசியல் வட்டாரத்தில் வியப்பை ஏற்படுத்தியுள்ளது.

இந்த அரசியல் மாற்றத்திற்குப் பின்னால் டெல்லி மேலிடத்தின் வியூகம் மிக முக்கியப் பங்கு வகிக்கிறது. குறிப்பாக, மத்திய அமைச்சர் பியூஷ் கோயல் தமிழகத்தில் தேசிய ஜனநாயகக் கூட்டணியை வலுப்படுத்தும் அசைன்மென்ட்டை வெற்றிகரமாக முடித்துள்ளார். அதிமுகவின் பிளவுகளைச் சரிசெய்து, சிதறிக்கிடந்த எதிர்க்கட்சிகளை ஒரே குடையின் கீழ் கொண்டுவரும் பணியை அவர் துரிதமாகச் செய்துள்ளார். பிரதமர் மோடி மற்றும் அமித் ஷாவின் நம்பிக்கைக்குரியவராகச் செயல்பட்ட கோயல், ஓபிஎஸ் மற்றும் ஈபிஎஸ் தரப்பினரிடையே நிலவிய கசப்புணர்வுகளைக் குறைக்கும் பாலமாக இருந்துள்ளார்.

ஏற்கனவே பியூஷ் கோயலின் முயற்சியால் டிடிவி தினகரன் தலைமையிலான அமமுக கூட்டணிக்குள் வந்துள்ள நிலையில், தற்போது ஓபிஎஸ்ஸும் இறங்கி வந்துள்ளார். தினகரன் மற்றும் ஈபிஎஸ் இடையே இருந்த 9 ஆண்டுகாலப் பகை முடிவுக்கு வந்ததும், அவர்கள் இருவரும் இணைந்து மேடையில் தோன்றியதும் அதிமுக தொண்டர்களுக்குப் புதிய உற்சாகத்தைத் தந்துள்ளன. குறிப்பாக முக்குலத்தோர் வாக்கு வங்கி சிதறாமல் இருப்பதை உறுதி செய்யவும், தென் மாவட்டங்களில் கூட்டணியைப் பலப்படுத்தவும் இந்த இணைப்பு முயற்சி மேற்கொள்ளப்பட்டு வருகிறது.

2026 தேர்தலில் திமுகவின் கோட்டைகளைத் தகர்க்க ஒரு ‘மெகா’ கூட்டணியை உருவாக்குவதே டெல்லியின் இலக்காக உள்ளது. பாமக, தமாகா போன்ற கட்சிகளுடன் தொகுதிப் பங்கீட்டுப் பேச்சுவார்த்தைகளைச் சுமுகமாக முடித்துள்ள பியூஷ் கோயல், எடப்பாடி பழனிசாமியை முதலமைச்சர் வேட்பாளராக அங்கீகரிப்பதன் மூலம் கூட்டணியின் தலைமையை உறுதிப்படுத்தியுள்ளார். தற்போது ஓபிஎஸ்ஸின் இந்தச் சமரசத் தூது, அதிமுக மீண்டும் ஒரு வலுவான தேர்தல் இயந்திரமாக உருவெடுக்கவும், வாக்குகளைச் சிதறவிடாமல் திமுகவிற்கு நேரடி சவால் அளிக்கவும் வழிவகுக்கும் என எதிர்பார்க்கப்படுகிறது.