நெல்லை அருகே செல்போன் பார்த்ததை தந்தை கண்டித்ததால், கல்லூரி மாணவி தூக்கிட்டுத் தற்கொலை செய்து கொண்ட சம்பவம் பெரும் சோகத்தையும் அதிர்ச்சியையும் ஏற்படுத்தியுள்ளது. திருநெல்வேலி பழையபேட்டை அருகே உள்ள கிருஷ்ணபேரியைச் சேர்ந்த தர்மராஜா என்பவரது மகள் ராமலட்சுமி (18), சீதபற்பநல்லூர் பகுதியில் உள்ள கல்லூரியில் பி.காம் முதலாம் ஆண்டு படித்து வந்தார். படிப்பில் கவனம் செலுத்தாமல் ராமலட்சுமி எப்போதும் செல்போனைப் பார்த்துக் கொண்டிருந்ததாகக் கூறப்படுகிறது. இதனைத் தந்தை கண்டித்து, அவரிடமிருந்த செல்போனை வாங்கியதுடன் அறிவுரையும் வழங்கியுள்ளார்.
தந்தையின் கண்டிப்பால் மனமுடைந்த ராமலட்சுமி, நேற்று முன்தினம் இரவு தனது அறைக்குச் சென்றவர், தூக்கிலிட்டுத் தற்கொலை செய்து கொண்டார். மறுநாள் காலை நீண்ட நேரமாகியும் கதவு திறக்கப்படாததால், ஜன்னல் வழியாகப் பார்த்த பெற்றோர் ராமலட்சுமி தூக்கில் தொங்குவதைக் கண்டு கதறித் துடித்தனர். அக்கம் பக்கத்தினர் உதவியுடன் கதவை உடைத்து அவரை மீட்டபோதும், அவர் ஏற்கனவே உயிரிழந்தது தெரியவந்தது. இது குறித்து பேட்டை போலீசார் வழக்குப் பதிவு செய்து தீவிர விசாரணை நடத்தி வருகின்றனர்.
இந்தத் துயரச் சம்பவம் இன்றைய ‘ஜென்-இசட்’ (Gen-Z) தலைமுறை எதிர்கொள்ளும் உளவியல் சிக்கல்களைப் பிரதிபலிப்பதாக சமூக ஆர்வலர்கள் கவலை தெரிவிக்கின்றனர். நவீன யுகத்தில் குழந்தைகள் மற்றும் இளைஞர்கள் செல்போன் திரைக்குள் தங்களை முழுமையாகத் தொலைத்துவிடுகின்றனர். அக்கம் பக்கம் இருப்பவர்களுடன் பேசுவதோ, பெற்றோரின் அறிவுரைகளை ஏற்பதோ குறைந்து வருகிறது. ஆசிரியர்கள் மற்றும் பெரியவர்கள் சொல்லும் ஒழுக்க நெறிகளை ஒரு சுமையாகக் கருதும் போக்கு அதிகரித்து வருவது ஆரோக்கியமானதல்ல.
சிறுவயது முதலே எவ்வித ஏமாற்றங்களையும் சந்திக்காமல், அதிக செல்லத்துடன் வளர்க்கப்படும் குழந்தைகள், மிகச்சிறிய தோல்விகளைக் கூட தாங்கிக்கொள்ளும் மனப்பக்குவம் இல்லாமல் வளர்கிறார்கள். தலைமுடியை வெட்டுவது, நன்றாகப் படிப்பது போன்ற சாதாரண அறிவுரைகளைக்கூடத் தனிப்பட்ட அவமானமாகக் கருதி, விபரீத முடிவுகளைத் தேடிக்கொள்கிறார்கள். வளரிளம் பருவத்தினரின் மனநிலையைப் பெற்றோர்கள் புரிந்துகொள்வதும், அதே சமயம் பிள்ளைகள் யதார்த்தமான சவால்களை எதிர்கொள்ளும் வகையில் அவர்களைப் பக்குவப்படுத்துவதும் இன்றைய காலத்தின் கட்டாயமாக உள்ளது.