அரசு அலுவலகங்களில் தங்களது பணிகள் தடையின்றி முடிவதற்காகப் பொதுமக்கள் லஞ்சம் கொடுக்க வேண்டிய கட்டாயச் சூழல் இருப்பதாகத் தொடர்ச்சியாகப் புகார்கள் எழுந்து வருகின்றன. லஞ்ச ஒழிப்புத் துறையின் நடவடிக்கைகள் மற்றும் அரசின் பல்வேறு முயற்சிகள் தொடர்ந்து மேற்கொண்டாலும், ஆங்காங்கே லஞ்ச முறைகேடுகள் வெளிவருவதும் கைது நடவடிக்கைகள் தொடர்வதும் வாடிக்கையாகிவிட்டது. பத்திரப்பதிவு போன்ற துறைகளில் இந்தத் தொல்லைகள் இன்னும் அதிகமாகவே உள்ளதாக மக்கள் குற்றம்சாட்டுகின்றனர்.
இத்தகைய சூழலில்தான், விருதுநகர் மாவட்டம் சாத்தூர் நெடுஞ்சாலைத்துறை கட்டுமானம் மற்றும் பராமரிப்புப் பிரிவில் இளநிலை பொறியாளராகப் பணியாற்றும் மாரிமுத்து என்பவர் செய்துள்ள ஒரு விஷயம் ஒட்டுமொத்த தமிழகத்தின் கவனத்தையும் ஈர்த்துள்ளது. பொதுவாக அரசு அலுவலகங்களில் அதிகாரிகளின் பெயரும் பதவியும் மட்டுமே பொறிக்கப்பட்ட பெயர் பலகைகள் வைக்கப்பட்டிருக்கும். ஆனால், மாரிமுத்து தனது அலுவலக மேஜையின் மீது “லஞ்சம் வாங்குவதும், கொடுப்பதும் தண்டனைக்குரிய குற்றம்” என்ற வாசகம் அடங்கிய பலகையைத் தைரியமாக வைத்துள்ளார்.
அலுவலகத்திற்கு வரும் பொதுமக்களுக்கு விழிப்புணர்வை ஏற்படுத்துவதோடு மட்டுமல்லாமல், தன்னுடன் பணியாற்றும் மற்ற சக ஊழியர்களுக்கும் இது ஒரு கடுமையான நினைவூட்டலாக இருக்க வேண்டும் என்ற நோக்கத்தில் அவர் இந்தச் செயலில் இறங்கியுள்ளார். அவரது இந்த அதிரடியான மற்றும் நேர்மையான முன்னெடுப்புக்குச் சமூக வலைதளங்களில் பொதுமக்கள் மற்றும் சமூக ஆர்வலர்கள் மத்தியில் பெரும் பாராட்டுக்கள் குவிந்து வருகின்றன.
இந்தக் ‘கறார் அதிகாரி’ மாரிமுத்து இதற்கு முன்னரும் தனது நேர்மைக்காகப் பெயெரெடுத்தவர் என்பது குறிப்பிடத்தக்கது. கடந்த 2021 ஆம் ஆண்டு நடைபெற்ற சட்டமன்றத் தேர்தலின்போது கோவில்பட்டி தொகுதியில் பறக்கும் படை அதிகாரியாகப் பணியாற்றிய அவர், அப்போது அமைச்சராக இருந்த கடம்பூர் ராஜு மீது தேர்தல் விதிமீறல் தொடர்பாக வழக்குப்பதிவு செய்து தன் பணியில் சமரசமற்றவர் என்பதை நிரூபித்திருந்தார். தற்போது சாத்தூரில் அவர் காட்டியுள்ள இந்த விழிப்புணர்வுச் செயல் மிகுந்த வரவேற்பைப் பெற்றுள்ளது.
மறுபுறம், ஊட்டி குந்தா தாலுகாவில் பட்டா பெயர் மாற்றத்திற்காக ரூ.1.25 லட்சம் லஞ்சம் கேட்ட கிராம நிர்வாக அலுவலர் உமா பிரியா கைது செய்யப்பட்டது போன்ற நிகழ்வுகள் தொடர்ந்து அரங்கேறி வரும் வேளையில், மாரிமுத்துவைப் போன்ற நேர்மையான அதிகாரிகளின் செயல்கள் மக்களுக்குச் சிறிய ஆறுதலைத் தருகின்றன. நிர்வாகத் துறையில் ஊழலை முற்றிலும் ஒழிக்க இதுபோன்ற தனிநபர் நேர்மை முயற்சிகளும், அதிகாரிகளின் உறுதியான மனநிலையும் அடிமட்டத்திலிருந்து மாற்றத்தை உருவாக்கும் என்பதில் ஐயமில்லை.