தமிழக அரசியலில் ஏற்பட்டுள்ள அதிரடி மாற்றங்களுக்கு இடையே, திமுகவில் இணைந்த முன்னாள் முதலமைச்சர் ஓ. பன்னீர்செல்வம், மதுரையில் நடைபெறும் அதிமுக – பாஜக கூட்டணி பொதுக்கூட்டத்தை கடுமையாக விமர்சித்துள்ளார். சட்டமன்றத் தேர்தல் நெருங்கி வரும் வேளையில், அதிமுக தலைமையிலான தேசிய ஜனநாயகக் கூட்டணி எத்தனை கூட்டங்களை நடத்தினாலும் அவர்கள் தேர்தலில் படுதோல்வியடைவது உறுதி என்று அவர் திட்டவட்டமாகக் கூறியுள்ளார்.
திமுகவில் இணைந்த பிறகு சென்னையில் செய்தியாளர்களைச் சந்தித்த அவர், முதலமைச்சர் மு.க. ஸ்டாலின் அவர்கள் மக்கள் அனைவரையும் பாகுபாடின்றி வழிநடத்தி வருவதாகப் புகழ்ந்தார். திமுகவில் உள்ள அனைவரும் தன்னை ஒரு சகோதரனாகப் பாவித்து அன்புடன் வரவேற்பு அளித்துள்ளதாகவும், கட்சியின் மேலிடம் இடும் கட்டளைகளுக்கு ஏற்பத் தான் செயல்படப் போவதாகவும் அவர் நெகிழ்ச்சியுடன் தெரிவித்தார்.
தனது காரில் இருந்த ஜெயலலிதாவின் புகைப்படத்தை அகற்றியது குறித்து எழுந்த விமர்சனங்களுக்குப் பதிலளித்த ஓபிஎஸ், தற்போது தான் திமுகவில் இணைந்துள்ளதால் தலைவர் ஸ்டாலின் அவர்களின் புகைப்படம் இடம்பெறுவதில் எந்தத் தவறும் இல்லை என்று தெளிவுபடுத்தினார். மேலும், அடித்தட்டு மக்களின் முன்னேற்றத்திற்காகப் பாடுபட்ட தந்தை பெரியாரின் படத்தை அகற்றிய செயலுக்கு அவர் தனது கண்டனத்தைப் பதிவு செய்தார்.
எதிர்வரும் சட்டமன்றத் தேர்தலில் திமுக தலைவர் வாய்ப்பளிக்கும் பட்சத்தில் தான் போட்டியிடத் தயாராக இருப்பதாகவும், அந்தத் தேர்தலில் அதிமுக கூட்டணிக்கு மக்கள் தகுந்த பாடம் புகட்டுவார்கள் என்றும் அவர் குறிப்பிட்டார். எவ்வித மனப் போராட்டமும் இன்றி மிகுந்த மன மகிழ்ச்சியுடன் திமுகவில் இணைந்திருப்பதாகக் கூறிய அவர், அதிமுக இனி தேறாது என்பதையும் தனது பேச்சின் மூலம் சூசகமாக வெளிப்படுத்தினார்.