கேரள மாநிலம் கொல்லம் பகுதியில் உள்ள சங்கர் மருத்துவமனை அருகே பிரபலமான கிறிஸ்தவ மடம் ஒன்று அமைந்துள்ளது. இந்த மடத்தில் உள்ள தேவாலயத்தில் தூக்கில் தொங்கிய நிலையில் கன்னியாஸ்திரியின் சடலம் ஒன்று மீட்டெடுக்கப்பட்டது. அவருடைய சடலத்தை கைப்பற்றிய காவல் துறையினர் பிரேத பரிசோதனைக்கு அனுப்பி வைத்தனர். மேலும் சம்பவம் தொடர்பாக போலீசார் வழக்கு பதிவு செய்து விசாரணை மேற்கொண்டு வரும் நிலையில் தற்கொலை செய்து கொண்ட கன்னியாஸ்திரி மதுரையை சேர்ந்த மேரி ஸ்கலாஷ்டிகா(33) என்பது தெரிய வந்துள்ளது. இவர் கடந்த மூன்று வருடங்களாக தேவாலயத்தில் சேவையாற்றி வந்த நிலையில் தற்கொலை செய்து கொள்வதற்கு முன்பாக அவர் கடிதம் ஒன்றையும் எழுதியுள்ளார்.
அந்த கடிதத்தில் தனது தற்கொலைக்கான காரணத்தையும் அவர் தெரிவித்திருப்பதாக தெரிகிறது. மேலும் கடந்த சில மாதங்களாகவே அவர் கடும் மன உளைச்சலில் இருந்ததாகவும் விசாரணையில் தெரியவந்துள்ளது. மன அழுத்தத்தின் காரணமாக கன்னியாஸ்திரி தற்கொலை செய்து கொண்டிருக்கலாம் என்று காவல்துறையின் முதல் கட்ட விசாரணையில் தெரியவந்துள்ளது. தேவாலயத்தில் கன்னியாஸ்திரி தற்கொலை செய்து கொண்ட சம்பவம் பெரும் அதிர்ச்சியையும் பரபரப்பையும் ஏற்படுத்தியுள்ளது.