ஈரான் தனது செறிவூட்டப்பட்ட யுரேனியம் சேமிப்புக் கிடங்குகளைப் பாதுகாக்க நிலத்தடியில் பிரம்மாண்ட சுரங்கப்பாதைகளை அமைத்து, அவற்றின் நுழைவாயில்களில் கண்ணிவெடிகள் மற்றும் வெடிபொருட்களை வைத்துள்ளதாக அமெரிக்க உளவுத்துறை வட்டாரங்களை மேற்கோள் காட்டி சிஎன்என் (CNN) செய்தி வெளியிட்டுள்ளது. ஈரானிடம் தற்போது கிட்டத்தட்ட அரை டன் எடையுள்ள ஆயுதத் தரம் வாய்ந்த செறிவூட்டப்பட்ட யுரேனியம் இருப்பதாகக் கூறப்படுகிறது. இந்த யுரேனியத்தை அமெரிக்கா கைப்பற்றக்கூடும் என்ற அச்சத்தின் காரணமாகவே ஈரான் இந்த அதிரடியான தற்காப்பு நடவடிக்கைகளைத் தீவிரப்படுத்தியுள்ளது.
கடந்த சில வாரங்களாகவே ஈரான் தனது அணுசக்திப் பொருட்களைப் பாதுகாப்பதற்காகப் பல நிலத்தடி சுரங்கப்பாதைகளைத் தோண்டும் பணிகளில் ஈடுபட்டு வந்துள்ளது. இந்தச் சுரங்கப்பாதைகளின் நுழைவாயில்கள் முற்றிலும் வெடிபொருட்களால் நிரப்பப்பட்டுள்ளதால், அந்த இடங்களை மற்ற நாடுகள் அணுகுவது மிகவும் ஆபத்தானதாகவும், அதிக நேரம் எடுக்கும் செயலாகவும் மாறியுள்ளது. அமெரிக்க ராணுவத்திற்கு அதிபர் டிரம்ப் எப்போது வேண்டுமானாலும் இந்த யுரேனியத்தைக் கைப்பற்ற உத்தரவிடக்கூடும் என்ற சூழலில், ஈரானின் இந்த நடவடிக்கை ஒரு முக்கியப் பாதுகாப்பு அரணாகப் பார்க்கப்படுகிறது.
ஈரானின் இந்த வியூகம் தற்காலிகமாக அதற்கு வெற்றியைத் தேடித்தந்துள்ளது என்றே கூறலாம். ஏனெனில், இவ்வளவு பலத்த பாதுகாப்புடன் வெடிபொருட்களை நுழைவு வாயிலில் வைத்துள்ளதால், அமெரிக்கா என்னதான் முயற்சித்தாலும் தற்போதைக்கு யுரேனியத்தை எளிதில் கைப்பற்ற முடியாது. “யுரேனியம் ஒரு மலைக்கு அடியில் புதைக்கப்பட்டுள்ளது, அதை யாரும் நெருங்க முடியாது” என்று டிரம்ப் சமீபத்தில் கருத்துத் தெரிவித்திருந்ததன் மூலம், அமெரிக்கா இப்போதைக்கு இந்தத் திட்டத்தைத் தற்காலிகமாக நிறுத்தி வைத்துள்ளதாகத் தெரிகிறது.
இருப்பினும், இந்த நடவடிக்கையால் அமெரிக்கா-ஈரான் இடையே நிலவி வரும் அணுசக்தி பேச்சுவார்த்தை மேலும் சிக்கலடைந்துள்ளது. ஈரானின் யுரேனியத்தை அகற்றி அழிப்பதற்கான சர்வதேச ஒப்பந்தங்களை அமல்படுத்துவதில் இது பெரும் முட்டுக்கட்டையாக இருக்கும் என்று அரசியல் ஆய்வாளர்கள் கருதுகின்றனர். வல்லரசு நாடுகளுக்கு இடையே நிலவும் இந்த அணுசக்திப் பஞ்சாயத்துகள் விரைவில் முடிவுக்கு வந்து, உலகச் சந்தையில் கச்சா எண்ணெய் விநியோகம் சீராகி, பெட்ரோல் விலை குறைந்தால் போதும் என்பதே தற்போதைக்கு உலக மக்களின் எதிர்பார்ப்பாக உள்ளது.