அதிமுகவின் மூத்த தலைவர்களில் ஒருவராக இருந்த முன்னாள் அமைச்சர் ஆர். வைத்திலிங்கம், சமீபத்தில் தனது எம்.எல்.ஏ பதவியை ராஜினாமா செய்துவிட்டு திமுகவில் இணைந்தது டெல்டா மாவட்ட அரசியலில் பெரும் பரபரப்பை ஏற்படுத்தியது. வரும் 2026 சட்டசபை தேர்தலில் அவர் தனது சொந்த தொகுதியான ஒரத்தநாட்டில் மீண்டும் போட்டியிட விரும்புவதாகக் கூறப்படுகிறது. இருப்பினும், அவருக்கு அந்தத் தொகுதியில் மீண்டும் போட்டியிட வாய்ப்பு கிடைக்குமா என்பதில் தற்போது பெரும் சந்தேகம் எழுந்துள்ளது.
ஒரத்தநாடு தொகுதியில் அமைச்சரும், திமுக இளைஞரணி செயலாளருமான உதயநிதி ஸ்டாலினின் தீவிர ஆதரவாளராகக் கருதப்படும் டாக்டர் நரேந்திரனுக்கு வாய்ப்பு வழங்கப்படலாம் எனத் தகவல்கள் கசிந்துள்ளன. நீண்ட காலமாகத் தொகுதியில் கட்சிப் பணிகளில் ஈடுபட்டு வரும் நரேந்திரனுக்கு முக்கியத்துவம் அளிக்கப்படுவதால், திமுகவில் புதிதாக இணைந்த வைத்திலிங்கம் ஓரங்கட்டப்பட வாய்ப்புள்ளதாகக் கூறப்படுகிறது. இதனால், தனது அரசியல் எதிர்காலம் குறித்து வைத்திலிங்கம் தரப்பு கடும் அதிருப்தியில் இருப்பதாக அரசியல் வட்டாரங்கள் தெரிவிக்கின்றன.
வைத்திலிங்கத்தின் வருகை ஒருபுறம் திமுகவிற்குப் பலமாகப் பார்க்கப்பட்டாலும், தொகுதியில் ஏற்கனவே உழைத்து வரும் உடன்பிறப்புகள் மற்றும் உள்ளூர் நிர்வாகிகளிடையே இது கலக்கத்தை ஏற்படுத்தியுள்ளது. தங்களுக்குக் கிடைக்க வேண்டிய சீட், மாற்றுக்கட்சியிலிருந்து வந்தவர்களுக்குச் சென்றுவிடுமோ என்ற அச்சத்தில் அவர்கள் உள்ளனர். இதனால் ஒரத்தநாடு தொகுதியில் வேட்பாளர் தேர்வில் திமுக தலைமைக்கு ஒரு தர்மசங்கடமான சூழல் உருவாகியுள்ளது.