ஆசிரியர்களுக்கு குட் நியூஸ்.. டெட் எக்ஸாம் எழுத தேவையில்லை… தமிழக அரசின் மாஸ் உத்தரவு…!!

தமிழகத்தில் அரசு மற்றும் அரசு உதவி பெறும் பள்ளிகளில் பணியாற்றும் ஆசிரியர்களுக்கு மகிழ்ச்சியளிக்கும் வகையில், ஆசிரியர் தகுதித் தேர்வு தொடர்பாக புதிய அரசிதழ் அறிவிப்பை தமிழக அரசு வெளியிட்டுள்ளது. கடந்த ஆண்டு உச்ச நீதிமன்றம் வழங்கிய தீர்ப்பில், ஆசிரியர்கள் பணியில் தொடரவும் பதவி உயர்வு பெறவும் டெட் தேர்வு கட்டாயம் என்றும், தேர்ச்சி பெறாதவர்கள் விருப்ப ஓய்வு பெறலாம் என்றும் கூறப்பட்டிருந்தது. இதனால் சுமார் 1.75 லட்சம் ஆசிரியர்கள் பாதிக்கப்படும் சூழல் உருவாகி, பெரும் கவலையடைந்திருந்த நிலையில், தமிழக அரசின் இந்த புதிய அறிவிப்பு அவர்களுக்கு மிகப்பெரிய நிம்மதியை அளித்துள்ளது.

தற்போது வெளியாகியுள்ள புதிய அரசிதழின்படி, உயர்நிலைப் பள்ளி தலைமையாசிரியர் மற்றும் முதுகலை ஆசிரியர் ஆகிய பதவி உயர்வுகளுக்கு டெட் தேர்வு தேவையில்லை என்பது தெளிவாகியுள்ளது. இந்த இரண்டு முக்கிய பதவி உயர்வுகளுக்கும் டெட் தேர்வு கட்டாயமில்லை என்ற விபரம் அரசிதழில் குறிப்பிடப்பட்டுள்ளதால் ஆசிரியர்கள் மகிழ்ச்சி அடைந்துள்ளனர். அதே நேரத்தில், PSHM, MSHM மற்றும் பட்டதாரி ஆசிரியர் பதவி உயர்வுகளுக்கு டெட் தேர்வில் தேர்ச்சி பெறுவது கட்டாயம் என்றும் அந்த அரசிதழில் தெளிவாகக் குறிப்பிடப்பட்டுள்ளது.

இவற்றுடன் கூடுதலாக, பள்ளிக்கல்வித்துறையில் முதுகலை ஆசிரியர் பதவி உயர்வு வழங்கப்படும் போது, தொடக்கக் கல்வித்துறையில் பணியாற்றும் தகுதியான பட்டதாரி ஆசிரியர்களுக்கு 18 சதவீத இடங்கள் ஒதுக்கப்படும் என்றும் தமிழக அரசு அறிவித்துள்ளது. நீண்ட காலமாக பதவி உயர்வுக்காகக் காத்திருந்த ஆயிரக்கணக்கான ஆசிரியர்களின் குழப்பங்களுக்கு இந்த உத்தரவு முற்றுப்புள்ளி வைத்துள்ளது. தமிழக அரசின் இந்த அதிரடி நடவடிக்கை, ஆசிரியர்களின் பதவி உயர்வுக்கான பாதையை எளிதாக்கியுள்ளதால் ஆசிரியர் வட்டாரங்களில் இதற்குப் பெரும் வரவேற்பு கிடைத்துள்ளது.