சென்னை மக்களுக்கு செம குட் நியூஸ்…! பட்டா வாங்க இனி அலைய வேண்டாம்… கலெக்டர் எடுத்த அதிரடி முடிவு…!

சென்னை மாவட்ட ஆட்சியர் மாலதி ஹெலன் தலைமையில் நடைபெற்ற வருவாய் நிருவாகக் குழுக் கூட்டத்தில், பட்டா கோரி விண்ணப்பிக்கும் பொதுமக்கள் மீது வட்டாட்சியர்கள் விரைந்து நடவடிக்கை எடுக்க வேண்டும் என அதிரடி உத்தரவு பிறப்பிக்கப்பட்டுள்ளது. தமிழக அரசின் வழிகாட்டுதலின்படி ஒவ்வொரு மாதமும் நடத்தப்படும் இக்கூட்டம், மே மாதத்திற்காக சென்னை மாவட்ட ஆட்சியரகத்தில் நடைபெற்றது. இதில் வருவாய்த்துறை, நில அளவை மற்றும் பல்வேறு நல வாரிய அலுவலர்கள் கலந்துகொண்ட நிலையில், பொதுமக்களின் கோரிக்கைகளைத் தாமதமின்றி நிறைவேற்றுவதே அரசின் முதன்மை நோக்கம் என ஆட்சியர் வலியுறுத்தினார்.

இக்கூட்டத்தில், குறிப்பாக பட்டா மாறுதல், பெயர் மாற்றம் மற்றும் நில அளவை கோரி வரப்பெற்ற மனுக்களின் தற்போதைய நிலை குறித்து விரிவாக ஆய்வு செய்யப்பட்டது. வட்டாட்சியர் அலுவலகங்களில் நிலுவையில் உள்ள விண்ணப்பங்கள், அதற்கான காரணங்கள் மற்றும் காலக்கெடுவுக்குள் வழங்கப்பட்ட சான்றிதழ்கள் குறித்த தரவுகளை ஆட்சியர் சரிபார்த்தார். மக்கள் குறைதீர்க்கும் நாள் கூட்டங்களில் பெறப்படும் மனுக்களுக்கு முன்னுரிமை அளித்து, தகுதியுள்ள விண்ணப்பதாரர்களுக்கு உரிய நேரத்தில் சேவைகள் சென்றடைவதை உறுதி செய்ய வேண்டும் என்று அறிவுறுத்தப்பட்டது.

இறுதியாக, நீண்ட நாட்களாகத் தீர்வின்றி நிலுவையில் உள்ள மனுக்களைக் கண்டறிந்து, அவற்றுக்கு உடனடி தீர்வு காண வருவாய்த்துறை அலுவலர்களுக்குக் கடுமையான அறிவுறுத்தல்கள் வழங்கப்பட்டன. வட்டாட்சியர்கள் தங்களுக்கு வரும் கோரிக்கைகளைத் தேக்கமடையச் செய்யாமல், கள ஆய்வு மற்றும் ஆவணச் சரிபார்ப்புகளை விரைந்து முடிக்க வேண்டும் என்று ஆட்சியர் கேட்டுக்கொண்டார். இந்நிகழ்வில் மாவட்ட வருவாய் அலுவலர் சு.கீதா மற்றும் நில அளவைத் துறை உதவி இயக்குநர் உள்ளிட்ட முக்கிய அரசு உயர் அலுவலர்கள் பலர் பங்கேற்றனர்.