“அமைச்சரவையில் ட்விஸ்ட்”… தவெக-வில் சி.வி.சண்முகத்திற்கு டெல்லி பதவி?.. கூட்டணி கட்சிகள் போட்ட ரகசிய முட்டுக்கட்டை….!

தமிழக அரசியலில் நாளுக்கு நாள் அரங்கேறி வரும் பரபரப்பான திருப்பங்களுக்கு மத்தியில், முன்னாள் அமைச்சர் சி.வி.சண்முகத்தின் அடுத்தகட்ட அரசியல் நகர்வுகள் தற்போது பெரும் விவாதப் பொருளாக மாறியுள்ளன. கடந்த சட்டமன்றத் தேர்தலில் அதிமுக 47 இடங்களை மட்டுமே கைப்பற்றியதைத் தொடர்ந்து, எடப்பாடி பழனிசாமி தலைமையிலான அணி மற்றும் எஸ்.பி.வேலுமணி தலைமையிலான அணி என உட்கட்சிப் பூசல்கள் வெடித்ததாகக் கூறப்படுகிறது. சட்டமன்றத்தில் தவெக அரசு தனது பெரும்பான்மையை நிரூபிக்க வேலுமணி அணி ஆதரவளித்த நிலையில், அந்த அணியை சி.வி.சண்முகமே முன்னின்று வழிநடத்தினார். இதனால் தவெக அமைச்சரவையில் இடம் கிடைக்கும் என எதிர்பார்க்கப்பட்ட நிலையில், தவெக கூட்டணியில் உள்ள காங்கிரஸ், விசிக போன்ற கட்சிகளின் எதிர்ப்பால் அது சாத்தியமாகாமல் போகவே, அதிமுக வட்டாரத்தில் பெரும் குழப்பமும் அதிருப்தியும் நிலவி வருகிறது.

அதிமுக தலைமைக்கும் சி.வி.சண்முகத்திற்கும் இடையே ஏற்பட்டுள்ள இந்த மோதலுக்கு பல்வேறு உள்அரசியல் காரணங்கள் முன்வைக்கப்படுகின்றன. எடப்பாடி பழனிசாமி திமுகவுடன் நெருங்க முயல்வதாகவும், தவெக விடுத்த கூட்டணிக் அழைப்பை உதாசீனப்படுத்திவிட்டதாகவும் சண்முகம் தரப்பு பகிரங்கமாகக் குற்றம் சாட்டுகிறது. மேலும், அவரது ராஜ்யசபா எம்பி பதவியை ராஜினாமா செய்யக்கோரி அதிமுக தலைமை வற்புறுத்தியதும், அவரை மீண்டும் சேர்த்தால் விழுப்புரம் மாவட்ட அதிமுக நிர்வாகிகள் ஒட்டுமொத்தமாக ராஜினாமா செய்வோம் என இபிஎஸ்ஸிடம் எச்சரித்ததும் இந்த அரசியல் விலகலை தீவிரப்படுத்தியுள்ளது. இந்நிலையில், வேலுமணி அணியின் பெரும்பாலான எம்.எல்.ஏ-க்கள் இபிஎஸ்ஸுடன் சமரசம் செய்து கொண்ட போதிலும், சி.வி.சண்முகம் மற்றும் விஜயபாஸ்கர் ஆகியோர் மட்டுமே இன்னும் ஒதுங்கியே நிற்கிறார்கள்.

இந்தச் சூழலில்தான், சி.வி.சண்முகம் விரைவில் தமிழக வெற்றிக் கழகத்தில் இணைய வாய்ப்புள்ளதாக இணையத்தில் சில உறுதிப்படுத்தப்படாத சீக்ரெட் தகவல்கள் கசிந்து வருகின்றன. குறிப்பாக, விழுப்புரம் மாவட்டம் மயிலம் தொகுதி அதிமுக எம்.எல்.ஏ-வான அவருக்கு, தமிழக அரசின் டெல்லி சிறப்பு பிரதிநிதி பதவியை வழங்குவது தொடர்பாகத் தவெக தரப்பில் தீவிர பேச்சுவார்த்தை நடத்தப்பட்டு வருவதாக அரசியல் வட்டாரங்கள் பரபரக்கின்றன. அவர் தனது தற்போதைய பதவிகளை ராஜினாமா செய்யும் பட்சத்தில், டெல்லியில் பாஜக உள்ளிட்ட தேசியத் தலைவர்களுடன் அவருக்கு இருக்கும் நல்ல அரசியல் தொடர்புகளைப் பயன்படுத்தி, டெல்லியுடனான உறவை வலுப்படுத்த தவெக தலைமை திட்டமிட்டுள்ளதாகக் கூறப்படுகிறது.

இருப்பினும், தவெகவின் கூட்டணி கட்சிகளின் கடுமையான எதிர்ப்பு மற்றும் அக்கட்சியின் உள்வட்டார அதிருப்திகளுக்கு இடையே சி.வி.சண்முகத்திற்கு இந்தப் பதவி வழங்கப்படுமா என்பது இப்போதைக்கு ஒரு கேள்விக்குறியாகவே உள்ளது. ஒருவேளை அனைத்து தடைகளையும் தாண்டி அவர் தவெகவில் இணைந்தால், வடதமிழகத்தில் தவெகவிற்கு ஒரு வலுவான வாக்கு வங்கியும் சமுதாய ஆதரவும் கொண்ட மூத்த தலைவர் கிடைப்பார் என்பதும், அதிமுகவின் கோட்டையான விழுப்புரத்தில் அக்கட்சியை பலவீனப்படுத்த முடியும் என்பதும் நிதர்சனம். ஆனால், உள்ளூர் அதிமுக தொண்டர்களின் கடுமையான எதிர்ப்பையும் மீறி அவரால் தவெகவிற்குப் பெரிய அளவில் பலன் சேர்க்க முடியுமா என்பதைப் பொறுத்திருந்துதான் பார்க்க வேண்டும்.