தமிழகத்தில் நிலவும் எரிவாயு தட்டுப்பாடு மற்றும் விநியோகச் சிக்கல்களைக் கருத்தில் கொண்டு, கிராமப்புறங்களில் சமையல் எரிவாயு சிலிண்டர் முன்பதிவு மற்றும் விநியோக முறையில் புதிய மாற்றங்கள் கொண்டுவரப்பட்டுள்ளன. இதன்படி, இனி சிலிண்டர் முன்பதிவு செய்த மூன்று நாட்களுக்குள் வாடிக்கையாளர்களுக்கு விநியோகம் செய்யப்பட வேண்டும் என அறிவுறுத்தப்பட்டுள்ளது. எரிவாயு விநியோகத்தில் உள்ள அழுத்தத்தைக் குறைக்கவும், தட்டுப்பாட்டைச் சமாளிக்கவும் அரசு இத்தகைய முன்னெச்சரிக்கை நடவடிக்கைகளை மேற்கொண்டுள்ளது.
இருப்பினும், இந்த புதிய நடைமுறையில் கிராமப்புறங்களில் சிலிண்டர் முன்பதிவு செய்யும் கால இடைவெளி 45 நாட்களாக உயர்த்தப்பட்டுள்ளது. சராசரியாக நான்கு பேர் கொண்ட குடும்பத்திற்கு, மூன்று வேளை சமையல் செய்ய ஒரு சிலிண்டர் சுமார் 40 நாட்கள் மட்டுமே வரும் நிலையில், 45 நாட்கள் காத்திருக்க வேண்டும் என்பது பொதுமக்களிடையே பெரும் சிரமத்தை ஏற்படுத்தியுள்ளது. புக்கிங் செய்த பிறகு 3 நாட்கள் காத்திருப்பு காலம் என்பதையும் சேர்த்தால், மொத்தமாக 50 நாட்கள் வரை காத்திருக்க வேண்டிய சூழல் உருவாவதாகப் புகார்கள் எழுந்துள்ளன.
தற்போதைய எரிபொருள் தட்டுப்பாடு காரணமாக, முன்பதிவு செய்யும் அனைவருக்கும் தடையின்றி சிலிண்டர் கிடைக்க வேண்டும் என்ற நோக்கத்தில் இந்தத் தற்காலிக மாற்றங்கள் அமல்படுத்தப்பட்டுள்ளன. ஒரு சிலிண்டர் இருப்பில் இருக்கும்போதே, அவசரத் தேவை கருதி முன்கூட்டியே முன்பதிவு செய்பவர்களால், உண்மையிலேயே சிலிண்டர் தேவைப்படுபவர்களுக்கு விநியோகம் பாதிக்கப்படக்கூடாது என்பதே அரசின் இந்த விதிகளின் முக்கிய நோக்கமாக உள்ளது.
இந்த நடைமுறைச் சிக்கல்கள் தற்காலிகமானவை என்று கருதப்படும் நிலையில், அடுத்த ஒன்று அல்லது இரண்டு வாரங்களில் எரிபொருள் விநியோகம் சீரடைந்தவுடன், பழையபடி 15 நாட்களுக்கு ஒருமுறை சிலிண்டர் முன்பதிவு செய்யும் முறை மீண்டும் நடைமுறைக்கு வரக்கூடும் என்று எதிர்பார்க்கப்படுகிறது. அதுவரை பொதுமக்கள் பொறுமை காக்குமாறும், அவசியமானவர்களுக்கு முன்னுரிமை அளிக்க ஒத்துழைக்குமாறும் கேட்டுக்கொள்ளப்படுகிறார்கள்.