உலகளாவிய எரிபொருள் சூழல் மற்றும் விநியோகச் சங்கிலியில் ஏற்பட்டுள்ள மாற்றங்களைக் கருத்தில் கொண்டு, வீட்டு உபயோக சமையல் எரிவாயு சிலிண்டர் (LPG) முன்பதிவு விதிகளில் மத்திய அரசு மற்றும் எண்ணெய் நிறுவனங்கள் புதிய மாற்றங்களைக் கொண்டு வந்துள்ளன. இதுவரை ஒரு சிலிண்டர் பதிவு செய்ததற்கும் அடுத்த பதிவிற்கும் இடையே 15 நாட்கள் இடைவெளி இருக்க வேண்டும் என்ற விதி நடைமுறையில் இருந்தது. தற்போது இந்த கால அவகாசம் 21 நாட்களாக உயர்த்தப்பட்டுள்ளது.
இந்த புதிய நடைமுறையின்படி, ஒரு வாடிக்கையாளர் சிலிண்டரை டெலிவரி பெற்ற தேதியிலிருந்து அடுத்த 21 நாட்கள் வரை புதிய சிலிண்டருக்கு முன்பதிவு செய்ய முடியாது. இதற்கேற்ப எரிவாயு விநியோக ஏஜென்சிகளில் உள்ள மென்பொருள்கள் (Software) தற்போதே புதுப்பிக்கப்பட்டுள்ளன. இதனால், 21 நாட்கள் முடிவடைவதற்கு முன்னதாகவே வாடிக்கையாளர்கள் பதிவு செய்ய முயன்றால், மென்பொருள் அதனைத் தானாகவே நிராகரிக்கும் வகையில் கட்டமைப்பு மாற்றப்பட்டுள்ளது.
சமையல் எரிவாயுவின் தேவையற்ற சேமிப்பைத் தவிர்க்கவும், தட்டுப்பாடின்றி அனைவருக்கும் சிலிண்டர் கிடைப்பதை உறுதி செய்யவும் இந்த நடவடிக்கை எடுக்கப்பட்டுள்ளதாகக் கூறப்படுகிறது. தற்போது இந்த 21 நாள் இடைவெளி நடைமுறை பரிசீலனையில் உள்ள நிலையில், விரைவில் இது நாடு முழுவதும் முழுமையாக அமல்படுத்தப்பட உள்ளது. எரிவாயு நுகர்வோர் தங்களின் பயன்பாட்டைத் திட்டமிட்டுக்கொள்ள இந்த புதிய விதிமுறை அவசியமான ஒன்றாகப் பார்க்கப்படுகிறது.