தமிழகத்தில் தகுதியுள்ள நுகர்வோருக்கு மானிய விலையில் உணவுப் பொருட்கள் மற்றும் பொங்கல் பரிசு தொகுப்பு போன்ற நலத்திட்டங்களை வழங்க ரேஷன் கார்டுகள் இன்றியமையாத ஆவணமாக விளங்குகின்றன. புதிய ரேஷன் கார்டு தேவைப்படுவோர் பொது விநியோக திட்ட இணையதளத்தின் மூலம் விண்ணப்பிப்பதும், அதனை வட்ட வழங்கல் அதிகாரிகள் மற்றும் உணவு வழங்கல் துறை உதவி ஆணையர்கள் பரிசீலித்து ஒப்புதல் அளிப்பதும் நடைமுறையாக உள்ளது. ஆனால், தற்போதைய சூழலில் ஒவ்வொரு அலுவலகத்திற்கும் மாதந்தோறும் சராசரியாக 100 முதல் 200 விண்ணப்பங்கள் வரும் நிலையில், சில அதிகாரிகள் அரசியல் பின்னணி கொண்டவர்களின் சிபாரிசுகளுக்கும், லஞ்சத்திற்கும் ஆசைப்பட்டு தங்களுக்கு வேண்டியவர்களின் விண்ணப்பங்களை மட்டும் முன்னுரிமை கொடுத்து விரைவாக அங்கீகரிப்பதாகப் புகார்கள் எழுந்துள்ளன.
இத்தகைய முறைகேடுகளுக்கும், தகுதி வாய்ந்த சாமானிய மக்களின் காத்திருப்பு காலத்திற்கும் முற்றுப்புள்ளி வைக்கும் வகையில் உணவுப்பொருள் வழங்கல் துறை தற்போது ஒரு புதிய தொழில்நுட்ப வசதியை உருவாக்கத் திட்டமிட்டுள்ளது. இந்த புதிய திட்டத்தின்படி, இணையதளத்தில் விண்ணப்பிக்கப்படும் அனைத்து விண்ணப்பங்களும் அவற்றின் பதிவு வரிசை எண்களின் (Priority Order) அடிப்படையிலேயே மட்டுமே பரிசீலனைக்கு எடுத்துக் கொள்ளப்படும். இதன் மூலம் அதிகாரிகள் தன்னிச்சையாக குறிப்பிட்ட சில விண்ணப்பங்களை மட்டும் முந்திச் சென்று அங்கீகரிக்க முடியாது என்பதால், நிர்வாகத்தில் வெளிப்படைத்தன்மை அதிகரிப்பதோடு தகுதியானவர்களுக்கு உரிய நேரத்தில், முறைகேடின்றி புதிய ரேஷன் கார்டுகள் கிடைக்க வழிவகை ஏற்படும் என்று எதிர்பார்க்கப்படுகிறது.