ரேம்ப் வாக் முதல் ரூஃப் டாப் வரை.. “அப்படியே அட்டக் காப்பி” எல்லாம் நடிப்பா கோபால்.? விஜய்யை கலாய்க்கும் இணையவாசிகள்..!!

தமிழக வெற்றிக் கழகத்தைத் தொடங்கி தீவிர அரசியலில் ஈடுபட்டு வரும் நடிகர் விஜய், தனது கட்சி நிகழ்ச்சிகள் மற்றும் பரப்புரைகளின் போது ரசிகர்களைக் கவரும் வகையில் ‘ரேம்ப் வாக்’ செல்வது, சைக்கிள் பயணம் மேற்கொள்வது போன்ற செயல்களில் ஈடுபட்டு வருகிறார். விஜய் செய்யும் இத்தகைய ஸ்டைலான நகர்வுகள் அனைத்தும் அவரே கண்டுபிடித்தவை என்றும், பிற அரசியல் தலைவர்கள் அவரைப் பார்த்து அப்படியே காப்பி அடிக்கிறார்கள் என்றும் தவெக தொண்டர்கள் சமூக வலைதளங்களில் தொடர்ந்து பதிவிட்டு வருகின்றனர். இதனால், மற்ற தலைவர்களின் ஆதரவாளர்களுக்கும் தவெகவினருக்கும் இடையே இணையத்தில் ஒரு கருத்துப் போரே நடந்து வருகிறது.

உண்மையில் விஜய் தற்போது செய்யும் பல விஷயங்களை அவருக்கு முன்பே பல மூத்த அரசியல் தலைவர்கள் தமிழ்நாட்டில் செய்திருக்கிறார்கள். ஆனால், விஜய் தான் இதற்கு முன்னோடி என்ற பிம்பத்தை அவரது ரசிகர்கள் கட்டமைக்க முயல்வதாக விமர்சகர்கள் சுட்டிக்காட்டுகின்றனர். விஜய்க்கு முன்பு இருந்த அரசியல் கலாச்சாரத்தை அல்லது மற்ற தலைவர்களின் பழைய செயல்பாடுகளைக் கணக்கில் கொள்ளாமல், எல்லாவற்றிற்கும் விஜய்தான் ‘ஆரிஜின்’ என தவெகவினர் கொண்டாடுவது மற்ற கட்சியினரிடையே அதிருப்தியை ஏற்படுத்தியுள்ளது.

இந்தச் சூழலில், தற்போது விஜய்யின் பெரும்பாலான அரசியல் நகர்வுகள் மற்றும் மேடை பாவனைகள் அனைத்தும் ஆந்திர துணை முதல்வர் பவன் கல்யாணிடம் இருந்து அப்பட்டமாகப் பிரதி எடுக்கப்பட்டவை எனச் சமூக வலைதளங்களில் நெட்டிசன்கள் ஆதாரங்களுடன் கலாய்த்து வருகின்றனர். காரின் மேல் அமர்ந்து பயணம் செய்வது முதல் அவரது மேடைப் பேச்சு வரை பலவும் பவன் கல்யாணின் ‘ஜனசேனா’ பாணியில் இருப்பதாகக் கூறி, “விஜய்தான் மற்றவர்களைக் காப்பி அடிக்கிறார்” எனப் பதிவிட்டு தவெகவினரை இணையவாசிகள் சீண்டி வருகின்றனர்.