தமிழ்நாட்டில் 2026 சட்டமன்றத் தேர்தல் களம் சூடுபிடித்துள்ள நிலையில், தேசிய ஜனநாயகக் கூட்டணியில் (NDA) தொகுதிப் பங்கீடு தொடர்பான முக்கிய நகர்வுகள் டெல்லியில் மையம் கொண்டுள்ளன. அதிமுக பொதுச்செயலாளர் எடப்பாடி பழனிசாமி வியாழக்கிழமை இரவு டெல்லி சென்று மத்திய உள்துறை அமைச்சர் அமித்ஷாவைச் சந்தித்து ஆலோசனை நடத்தினார். சுமார் ஒரு மணி நேரத்திற்கும் மேலாக நீடித்த இந்தச் சந்திப்பில், கூட்டணி கட்சிகளுக்கான இட ஒதுக்கீடு மற்றும் குறிப்பாக சில குறிப்பிட்ட தொகுதிகளைக் கைப்பற்றுவதில் உள்ள இழுபறிகள் குறித்து விவாதிக்கப்பட்டதாகத் தெரிகிறது.
தொகுதிப் பங்கீடு குறித்து ஊடகவியலாளர்கள் எழுப்பிய கேள்விக்கு பதில் அளித்த தமிழக பாஜக தலைவர் நயினார் நாகேந்திரன், கூட்டணியில் எந்தவிதமான சிக்கலோ அல்லது மோதலோ இல்லை என்று திட்டவட்டமாகத் தெரிவித்துள்ளார். தங்களுக்கு விருப்பமான அல்லது செல்வாக்குள்ள தொகுதிகளைக் கேட்பது அரசியல் கட்சிகளின் இயல்பான உரிமைதான் என்றும், அதனை ‘பிரச்சினை’ என்று கருத முடியாது என்றும் அவர் விளக்கமளித்தார். மேலும், கூட்டணிக்குள் சுமூகமான பேச்சுவார்த்தை நடைபெற்று வருவதாகவும் அவர் உறுதிபடக் கூறினார்.
இந்தச் சூழலில், கூட்டணியின் மற்ற முக்கியத் தலைவர்களான பாமகவின் அன்புமணி ராமதாஸ் மற்றும் அமிமுக பொதுச்செயலாளர் டி.டி.வி. தினகரன் ஆகியோரும் டெல்லிக்கு பயணம் மேற்கொண்டுள்ளனர். இன்று அமித் ஷா முன்னிலையில் நடைபெறும் இரண்டாம் கட்டப் பேச்சுவார்த்தையில் நயினார் நாகேந்திரனும் பங்கேற்க உள்ளார். இதில் ஒவ்வொரு கட்சிக்கும் ஒதுக்கப்பட வேண்டிய தொகுதிகளின் எண்ணிக்கை மற்றும் குறிப்பிட்ட தொகுதிகள் குறித்த இறுதி முடிவு எட்டப்படும் என எதிர்பார்க்கப்படுகிறது.
அதிமுக தலைமை சுமார் 165 இடங்களிலும், பாஜக 25 முதல் 30 இடங்கள் வரையிலும் போட்டியிட வாய்ப்புள்ளதாக அரசியல் வட்டாரங்கள் தெரிவிக்கின்றன. பேச்சுவார்த்தைகள் அனைத்தும் டெல்லியில் நிறைவடைந்த பிறகு, மத்திய அமைச்சர் பியூஷ் கோயல் சென்னைக்கு வருகை தந்து, எடப்பாடி பழனிசாமி மற்றும் கூட்டணிக் கட்சித் தலைவர்களுடன் இணைந்து தொகுதிப் பங்கீட்டு ஒப்பந்தத்தில் முறைப்படி கையெழுத்திடுவார் என்று கூறப்படுகிறது. இதன் மூலம் அடுத்த சில நாட்களில் தேசிய ஜனநாயகக் கூட்டணியின் தேர்தல் வியூகம் முழுமையாக அறிவிக்கப்படும்.