“2 லட்சம் பேர், 35 ஏக்கர் மைதானம்”… மதுராந்தகத்தில் அதிமுக கூட்டணி காட்டும் விஸ்வரூபம்… அதிரப்போகும் தமிழகம்….!

2026-ஆம் ஆண்டு தமிழக சட்டமன்றத் தேர்தலை முன்னிட்டு, செங்கல்பட்டு மாவட்டம் மதுராந்தகத்தில் அதிமுக தலைமையிலான தேசிய ஜனநாயகக் கூட்டணியின் (NDA) பிரம்மாண்டப் பொதுக்கூட்டம் நடைபெற உள்ளது. சுமார் 35 ஏக்கர் பரப்பளவிலான பிரம்மாண்ட மைதானத்தில் நடைபெறவுள்ள இக்கூட்டத்தில், பிரதமர் நரேந்திர மோடி, மத்திய அமைச்சர் அமித் ஷா மற்றும் அதிமுக பொதுச்செயலாளர் எடப்பாடி பழனிசாமி உள்ளிட்ட முக்கியத் தலைவர்கள் பங்கேற்க உள்ளனர். இக்கூட்டத்தின் சிறப்பம்சமாக, பாஜக, அதிமுக மற்றும் பாமக உள்ளிட்ட கூட்டணிக் கட்சிகளைச் சேர்ந்த 2 லட்சத்திற்கும் அதிகமான தொண்டர்கள் கலந்துகொள்வார்கள் என்று எதிர்பார்க்கப்படுகிறது.

இந்த எழுச்சி மிகு பொதுக்கூட்டத்திற்காக மதுராந்தகத்தில் விரிவான சிறப்பு ஏற்பாடுகள் செய்யப்பட்டுள்ளன. முக்கியத் தலைவர்களின் வருகைக்காக 10 ஏக்கர் பரப்பளவில் மூன்று நவீன ஹெலிபேட் தளங்கள் அமைக்கப்பட்டுள்ளன. மாலை 3 மணி அளவில் கூட்டம் தொடங்க உள்ளதால், வெயிலின் தாக்கத்தைத் தவிர்க்க மைதானம் முழுவதும் மேற்கூரை வசதிகள் செய்யப்பட்டுள்ளன. மேலும், வண்டலூர் முதல் மேல்மருவத்தூர் வரையிலான சுமார் 25 கிலோமீட்டர் தொலைவிற்கு கூட்டணிக் கட்சிகளின் கொடிகள் மற்றும் பிரம்மாண்ட வரவேற்பு பேனர்கள் வைக்கப்பட்டு மதுராந்தகமே விழாக்கோலம் பூண்டுள்ளது.

பாதுகாப்பு வசதிகளைப் பொறுத்தவரை, பிரதமர் மற்றும் முக்கியப் பிரமுகர்களின் வருகையை முன்னிட்டு 7 அடுக்கு போலீஸ் பாதுகாப்பு போடப்பட உள்ளது. பொதுக்கூட்டத்திற்கு வரும் தொண்டர்கள் மற்றும் நிர்வாகிகளுக்குத் தனித்தனியாக அனுமதி அட்டைகள் வழங்கப்பட்டு, தீவிர சோதனைக்குப் பிறகே மைதானத்திற்குள் அனுமதிக்கப்பட உள்ளனர். மேடைக்கு அருகே தலைவர்கள் ஓய்வெடுப்பதற்காகத் தனி அறைகளும், வாகனங்களை நிறுத்துவதற்குத் தாராளமான இடவசதிகளும் செய்யப்பட்டுள்ளன. இந்தக் கூட்டத்தின் மூலம் தமிழக அரசியல் களத்தில் தேசிய ஜனநாயகக் கூட்டணி தனது பலத்தை நிரூபிக்கத் தயாராகி வருகிறது.