நாசிக்கில் உள்ள இந்தியாவின் முன்னணி தகவல் தொழில்நுட்ப நிறுவனமான டிசிஎஸ் (TCS) கிளையில் பணிபுரியும் பெண் ஊழியர்கள், அங்கு அரங்கேறிய பாலியல் வன்கொடுமைகள் மற்றும் கட்டாய மதமாற்ற முயற்சிகள் குறித்து அளித்துள்ள வாக்குமூலம் ஒட்டுமொத்த கார்ப்பரேட் துறையையும் உலுக்கியுள்ளது. கடந்த 2025-ம் ஆண்டு ஜூன் மாதம் திருமணமான கையோடு பணியில் சேர்ந்த இளம் பெண் ஒருவர், தனது மேலதிகாரிகள் மற்றும் சக ஊழியர்கள் தனக்கு இழைத்த கொடுமைகளை ஆதாரங்களுடன் வெளிப்படுத்தியுள்ளார். லோன் பிரிவுத் தலைவர் ரஸா மேனன் என்பவர், அந்தப் பெண்ணின் தனிப்பட்ட வாழ்க்கை குறித்து அநாகரிகமாகக் கேள்விகள் எழுப்பியதுடன், மற்ற ஊழியர்கள் முன்னிலையில் அவரை “பிளேயர்” என அழைத்து மனரீதியாகத் துன்புறுத்தியது விசாரணையில் தெரியவந்துள்ளது.
பாதிக்கப்பட்ட பெண் அளித்த புகாரில், கடந்த மார்ச் மாதம் அலுவலகத்திற்குப் புடவை அணிந்து வந்தபோது, லாபியில் வைத்து ரஸா மேனன் அவரது முந்தானையைப் பிடித்து இழுத்து அநாகரிகமாக நடந்துகொண்டதாகக் குறிப்பிட்டுள்ளார். மேலும், ஆசிப் என்ற மற்றொரு ஊழியர் அந்தப் பெண்ணின் உடல் பாகங்களைத் தொட்டு அத்துமீறியதுடன், “உன் கணவருக்குச் சமைப்பது போல் எனக்கும் சமைத்துக் கொடு, உன் உடல் தேவைகளை நான் பூர்த்தி செய்கிறேன்” என்று ஆபாசமாகப் பேசியுள்ளார். இந்த அத்துமீறல்கள் எல்லை மீறிய நிலையில், அந்தப் பெண் கேலரியில் நின்றுகொண்டிருந்தபோது அவர் வலுக்கட்டாயமாகக் கட்டிப்பிடித்து வக்கிரமாக நடந்துகொண்டதும் அதிர்ச்சியை ஏற்படுத்தியுள்ளது.
இந்த விவகாரத்தில் பாலியல் தொல்லைகளுடன் மத ரீதியான சீண்டல்களும் அரங்கேறியுள்ளது பெரும் பதற்றத்தை உருவாக்கியுள்ளது. குற்றம் சாட்டப்பட்டவர்கள் இந்து கடவுள்களை இழிவுபடுத்திப் பேசியதுடன், பணியில் முன்னேற வேண்டுமென்றால் தாங்கள் சொல்வதைக் கேட்க வேண்டும் என மிரட்டியுள்ளனர். இந்தப் புகார்களின் அடிப்படையில், ஒரு பெண் மேலாளர் உட்பட எட்டு பேரை மகாராஷ்டிர காவல்துறை அதிரடியாகக் கைது செய்துள்ளது. இந்தச் சம்பவம் குறித்து மாநில முதல்வர் தேவேந்திர ஃபட்னாவிஸ் கடும் கண்டனம் தெரிவித்துள்ளதோடு, குற்றவாளிகள் மீது பாரபட்சமின்றி நடவடிக்கை எடுக்கப்படும் என்று உறுதி அளித்துள்ளார்.
இந்த விவகாரம் குறித்து விளக்கம் அளித்துள்ள டிசிஎஸ் நிர்வாகம், இதுபோன்ற ஒழுக்கமற்ற செயல்களுக்குத் தங்கள் நிறுவனத்தில் துளியும் இடமில்லை என்று திட்டவட்டமாகத் தெரிவித்துள்ளது. புகார் எழுந்த உடனேயே உள் விசாரணை நடத்தப்பட்டு, குற்றம் சாட்டப்பட்ட ஊழியர்கள் அனைவரும் உடனடியாகப் பணிநீக்கம் செய்யப்பட்டுள்ளதாக நிறுவனம் அறிவித்துள்ளது. கார்ப்பரேட் கலாச்சாரம் மற்றும் பெண் ஊழியர்களின் பாதுகாப்பு குறித்த விவாதங்களை மீண்டும் ஒருமுறை முன்னெடுத்துள்ள இந்தச் சம்பவம், தற்போது தேசிய அளவில் கவனம் பெற்று வருகிறது.