மூடப்பட்டதாக சொன்ன 717 டாஸ்மாக் கடைகள் ரகசியமாக இயங்குகிறதா?… அரசை அதிரவைத்த நயினார் நாகேந்திரனின் ‘வெள்ளை அறிக்கை’ சவால்…!

தமிழகத்தில் மூடப்பட்டதாகக் கூறப்படும் 717 டாஸ்மாக் மதுக்கடைகளின் முழு விவரங்களையும், அவை அமைந்திருந்த இடங்களின் முகவரிகளையும் மாவட்ட வாரியாகத் தொகுத்து தமிழக அரசு உடனடியாக ஒரு வெள்ளை அறிக்கையாக வெளியிட வேண்டும் என்று பாஜக மாநிலத் தலைவர் நயினார் நாகேந்திரன் வலியுறுத்தியுள்ளார். அரசு அறிவித்தபடி இந்தக் கடைகள் அனைத்தும் முழுமையாக மூடப்பட்டதா அல்லது வெறும் கண் துடைப்புக்காக இந்த அறிவிப்பு வெளியிடப்பட்டதா என்ற சந்தேகம் பொதுமக்கள் மத்தியில் எழுந்துள்ளதாக அவர் குறிப்பிட்டுள்ளார்.

பள்ளிகள் மற்றும் வழிபாட்டுத் தலங்களுக்கு அருகில் உள்ள கடைகளை முழுமையாக மூடாமல், அதே பகுதிக்குள்ளேயே இடமாற்றம் செய்யும் நடவடிக்கைகள் நடப்பதாக அவர் குற்றம் சாட்டியுள்ளார். மேலும், மக்களின் கவனத்தைத் திசைதிருப்பி விளம்பரம் தேடும் நோக்கில், வருவாய் குறைந்த மற்றும் பார் வசதி இல்லாத கடைகளை மட்டுமே தேர்ந்தெடுத்து மூடிவிட்டு, 717 கடைகளையும் மூடிவிட்டதாக அரசு நாடகமாடுவதாகவும் நயினார் நாகேந்திரன் தனது எக்ஸ் தளப் பதிவில் சாடியுள்ளார்.

அரசு உத்தரவின் பேரில் மூடப்பட்டதாகச் சொல்லப்பட்ட சில கடைகள் மீண்டும் திறக்கப்பட்டு இயங்கி வருவதாகத் தொடர் புகார்கள் எழுந்துள்ளதைச் சுட்டிக்காட்டிய நயினார் நாகேந்திரன், “மாற்று சக்தி” என்று கூறிக்கொண்டு ஆட்சி நடத்துபவர்கள், கள நிலவரத்தில் உண்மைக்கு மாறாகச் செயல்படுவதாகக் குறிப்பிட்டுள்ளார். எனவே, இந்த விவகாரத்தில் வெளிப்படைத்தன்மையை உறுதி செய்ய, மூடப்பட்ட கடைகளின் அசல் பட்டியலை முகவரியுடன் அரசு பகிரங்கமாக வெளியிட வேண்டும் என அவர் கோரியுள்ளார்.