நயினாருக்கு செக் வைத்த அதிமுக… நெல்லையை மீட்டெடுத்த தச்சை கணேசராஜா – சாத்தூருக்கு மாறும் மாஸ்டர் பிளான்..?

அதிமுகவின் கோட்டையாகக் கருதப்படும் திருநெல்வேலி சட்டமன்றத் தொகுதியை, 2026 தேர்தலில் மீண்டும் தனது நேரடி கட்டுப்பாட்டிற்குள் அதிமுக கொண்டுவந்துள்ளது. கடந்த 2001 மற்றும் 2011-ம் ஆண்டுகளில் அதிமுக வேட்பாளராகப் போட்டியிட்டு வெற்றி பெற்ற நயினார் நாகேந்திரன், 2021 தேர்தலில் பாஜக சார்பில் போட்டியிட்டு அதே தொகுதியில் எம்.எல்.ஏ-வாகப் பொறுப்பேற்றார். இந்நிலையில், வரவிருக்கும் 2026 சட்டமன்றத் தேர்தலில் இத்தொகுதியைத் தனது வசமே வைத்துக்கொள்ள அதிமுக முடிவு செய்துள்ளதால், கட்சியின் மாவட்டச் செயலாளர் தச்சை கணேசராஜா அங்கு வேட்பாளராகக் களமிறக்கப்படுகிறார்.

தொகுதிப் பங்கீட்டின்படி திருநெல்வேலியை அதிமுக பெற்றுள்ளதால், பாஜக மாநிலத் தலைவர்களில் ஒருவரான நயினார் நாகேந்திரன் இந்த முறை விருதுநகர் மாவட்டத்திலுள்ள சாத்தூர் தொகுதியில் போட்டியிடத் திட்டமிட்டுள்ளதாகத் தகவல்கள் வெளியாகியுள்ளன. சாத்தூர் தொகுதியில் குறிப்பிட்ட சமூக வாக்குகள் கணிசமாக இருப்பதும், அங்கு அவருக்கு நிலவும் சாதகமான சூழலுமே இந்த இடமாற்றத்திற்குக் காரணமாகச் சொல்லப்படுகிறது. கால் நூற்றாண்டிற்கும் மேலாகத் திருநெல்வேலி அரசியலில் கோலோச்சிய நயினார் நாகேந்திரன், தற்போது புதிய களம் காண்பது தென்மாவட்ட அரசியலில் பெரும் எதிர்பார்ப்பை ஏற்படுத்தியுள்ளது.