நெல்லை நகரில் நடைபெற்ற செய்தியாளர் சந்திப்பில் பேசுகையில், பாஜக மாநிலத் தலைவர் நயினார் நாகேந்திரன் தமிழக அரசு, சட்டமன்ற நடவடிக்கைகள் மற்றும் கம்யூனிஸ்ட் கட்சிகளின் அரசியல் நிலைப்பாடுகள் குறித்து மிகக் கடுமையான விமர்சனங்களை முன்வைத்தார். தற்போதைய சட்டமன்ற செயல்பாடுகளை பொதுமக்கள் விந்தையாகவும் வேடிக்கையாகவும் பார்க்கத் தொடங்கியுள்ளனர் என்று சாடிய அவர், இத்தனை ஆண்டுகள் காக்கப்பட்ட சட்டமன்றத்தின் மாண்பும் வரலாறும் சீர்குலைந்துள்ளதாகக் குற்றம்சாட்டினார். பல இன, மத மக்களை உள்ளடக்கிய அமைச்சர்கள் மற்றும் சபாநாயகர்கள் ஆட்சி செய்த காலம் மாறி, இன்று மதச் சார்புடைய சபாநாயகர் மற்றும் அமைச்சர்களைச் சட்டமன்றத்தில் பார்க்கும் சூழல் உருவாகியுள்ளதாகவும், மக்கள் நலனை மறந்து தனிப்பட்ட குடும்பங்கள் மற்றும் மத ரீதியான பேச்சுகளிலேயே அவையின் நேரம் விரயமாகிறது என்றும் சுட்டிக்காட்டினார்.
சமீபத்திய அரசியல் நகர்வுகள் குறித்துப் பேசிய அவர், சட்டமன்றப் பொதுத்தேர்தல் முடிந்த வெறும் மூன்று மாதங்களுக்குள்ளாகவே இடைத்தேர்தல்கள் வருவது எதனால் என கேள்வி எழுப்பினார். இது வெளிப்படையாக நடைபெற்ற குதிரை பேரத்தின் விளைவே என பொதுமக்கள் கருதுவதாகத் தெரிவித்த அவர், இடைத்தேர்தல்கள் மூலம் மக்கள் பணமும் ஜனநாயக நெறிமுறைகளும் வீணடிக்கப்படுவதாகக் சாடினார். மேலும் கம்யூனிஸ்ட் கட்சிகளின் தெளிவற்ற அரசியல் நகர்வுகளை விமர்சித்த அவர், கம்யூனிஸ்டுகள் யாருக்கு ஆதரவு என்பதைத் தங்களின் உறுதியான நிலைப்பாடாக வெளிப்படையாக அறிவிக்க வேண்டும் என்றும், அரைகுறை ஆதரவை அளிப்பது எதிர்காலத்தில் சந்தர்ப்பவாத அரசியலாகவே முடிவடையும் என்றும் எச்சரித்தார்.
தமிழக முதலமைச்சரின் திடீர் லண்டன் பயணம் குறித்தும் நயினார் நாகேந்திரன் பல்வேறு சந்தேகங்களை எழுப்பினார். முதலமைச்சர் உண்மையிலேயே தொழில் முதலீடுகளை ஈர்ப்பதற்காகத்தான் வெளிநாடு சென்றாரா அல்லது அது அவருடைய சொந்த பயணமா என்ற கேள்வி எழுந்துள்ளதைச் சுட்டிக்காட்டினார். நான்கு நாட்கள் மட்டுமே கொண்ட இந்த குறுகிய பயணத்தில் எத்தனை தொழில் முதலீட்டாளர்களை அவர் சந்திக்க முடியும் என்பது மிகப் பெரிய கேள்விக்குறியாக உள்ளது என்றும், அரசு செலவில் யாரெல்லாம் உடன் சென்றுள்ளார்கள் என்ற விவரங்கள் மறைக்கப்பட்டுள்ளதாகவும் அவர் குற்றம்சாட்டினார். முதலமைச்சரின் வெளிநாட்டுப் பயணம் தவறல்ல என்றாலும், அது வெளிப்படைத்தன்மையுடன் இருக்க வேண்டியது அவசியம் என்றார்.
முன்னாள் முதலமைச்சர் ஜெயலலிதா ஆட்சிக்காலத்தில் தாம் தொழில்துறை அமைச்சராக இருந்த அனுபவத்தைக் குறிப்பிட்ட நயினார் நாகேந்திரன், மோட்டோரோலா, நோக்கியா, பாக்ஸ்கான், ஏசியன் பெயிண்ட்ஸ், டெல், அசண்டாஸ் போன்ற உலகளாவிய முன்னணி நிறுவனங்களை தமிழகத்திற்கு ஈர்த்தது தொழில்துறையின் தீவிர முயற்சியால்தான் சாத்தியமானது என நினைவுகூர்ந்தார். வழக்கமாகத் தொழில்துறை அமைச்சரே முன்னின்று செய்ய வேண்டிய முதலீட்டு ஈர்ப்புப் பணிகளை தற்போது முதலமைச்சரே நேரடியாகச் சென்று செய்வது ஏன் எனக் கேள்வி எழுப்பிய அவர், லண்டன் பயணத்தில் யாரைச் சந்தித்தார், எவ்வளவு முதலீடுகள் ஈர்க்கப்பட்டன என்பது குறித்த விரிவான அறிக்கையை முதலமைச்சர் தமிழகம் திரும்பியவுடன் மக்களுக்கு உடனடியாக விளக்க வேண்டும் என வலியுறுத்தினார்.