3,000 மீட்டர் ஆழத்தில் மர்மம்.. ஆஸ்திரேலிய கடலுக்கு அடியில் ஒளிந்திருந்த அதிசயம்…. விஞ்ஞானிகளை அதிரவைத்த 110 புதிய உயிரினங்கள்…!

ஆஸ்திரேலியாவின் கோரல் கடல் (Coral Sea) பகுதியில் நடத்தப்பட்ட பிரம்மாண்ட ஆழ்கடல் ஆய்வு, உலக நாடுகளின் கவனத்தை ஈர்த்துள்ளது. சர்வதேச கடல் ஆராய்ச்சியாளர்கள் மற்றும் ஆஸ்திரேலியாவின் சிசிரோ (CSIRO) விஞ்ஞானிகள் இணைந்து மேற்கொண்ட இந்த தேடுதல் வேட்டையில், இதுவரை மனிதக் கண்களுக்குப் புலப்படாத 110-க்கும் மேற்பட்ட புதிய உயிரினங்கள் கண்டுபிடிக்கப்பட்டுள்ளன. கடலின் மர்மங்களை வெளிக்கொணரும் நோக்கில் நடத்தப்பட்ட இந்த ஆய்வில், சில இடங்களில் புதிய உயிரினங்களின் எண்ணிக்கை 200-க்கும் மேல் இருக்கலாம் என விஞ்ஞானிகள் கணித்துள்ளனர்.

இந்த ஆராய்ச்சி கடலின் மிகவும் ஆழமான, அதாவது 200 மீட்டர் முதல் 3,000 மீட்டர் வரையிலான பகுதிகளில் நடைபெற்றது. சூரிய ஒளி கூட சென்றடைய முடியாத இந்த அடர்ந்த ஆழ்கடல் பகுதிகளில், நவீன தொழில்நுட்பம் கொண்ட கப்பல்கள் மற்றும் ஆய்வுக் கருவிகள் மூலம் மாதிரிகள் சேகரிக்கப்பட்டன. இதுவரை மிகக் குறைவாகவே ஆராயப்பட்ட இந்தப் பகுதிகளில் இவ்வளவு செழிப்பான உயிர்ச் சூழல் நிலவுவது, கடல்சார் உயிரியல் வரலாற்றில் ஒரு மைல்கல்லாகக் கருதப்படுகிறது.

கண்டுபிடிக்கப்பட்ட உயிரினங்களில் அரிய வகை கடல் நண்டுகள் (Squat Lobsters), விசித்திரமான கடல் பஞ்சுகள் (Sponges) மற்றும் இதுவரை பார்த்திராத மென்மையான பவளப்பாறைகள் ஆகியவை அடங்கும். குறிப்பாக, 3,000 மீட்டர் ஆழத்தில் இத்தனை புதிய வகை மீன்களும், கடல் பூச்சிகளும் வாழ்ந்து வருவது விஞ்ஞானிகளையே வியப்பில் ஆழ்த்தியுள்ளது. ஒவ்வொரு உயிரினமும் அதன் வாழ்விடத்திற்கு ஏற்ப தனித்துவமான உடலமைப்பையும், உயிர்வாழும் முறையையும் கொண்டிருப்பது ஆச்சரியமான விஷயமாகும்.

சிசிரோ மற்றும் ‘ஓஷன் சென்சஸ்’ அமைப்பின் இந்த கண்டுபிடிப்பு, கடலின் ஆழத்தில் இன்னும் கண்டறியப்படாத ஆயிரக்கணக்கான உயிரினங்கள் மறைந்திருப்பதை உறுதி செய்துள்ளது. இந்தப் பகுதி இன்னும் முழுமையாக ஆராயப்படாததால், வரும் காலங்களில் மேலும் பல புதிய உண்மைகள் வெளிவர வாய்ப்புள்ளது. கடலுக்கு அடியில் ஒளிந்திருக்கும் இந்த ரகசிய உலகம், பூமியின் பல்லுயிர் பெருக்கத்தைப் புரிந்துகொள்ளவும், கடல் வளங்களைப் பாதுகாக்கவும் ஒரு புதிய வாசலைத் திறந்து வைத்துள்ளது.