மும்பையைச் சேர்ந்த கனிகா மோகன் சக்சேனா என்ற பெண், மும்பையிலிருந்து இந்தோனேசியாவின் பாலி தீவிற்குச் செல்வதற்காக மேக் மை ட்ரிப் இணையதளம் மூலம் இண்டிகோ விமானத்தில் பயணச்சீட்டு முன்பதிவு செய்திருந்தார். ஆனால், அவர் பயணிக்கவிருந்த விமானம் திடீரென ரத்து செய்யப்பட்டதாக இண்டிகோ நிறுவனம் அவருக்குக் குறுஞ்செய்தி அனுப்பியது. அதற்கு மாற்றாக 18 மணி நேர இடைநிறுத்தத்துடன் கூடிய வேறொரு விமான ஏற்பாடு வழங்கப்பட்ட நிலையில், துரதிர்ஷ்டவசமாக அந்த மாற்று விமானமும் ரத்து செய்யப்பட்டதாக அவருக்குத் தகவல் கிடைத்தது. அடுத்தடுத்து விமானங்கள் ரத்து செய்யப்பட்டதால் ஏமாற்றமடைந்த கனிகா, தான் செலுத்திய மொத்த பயணக் கட்டணமான ரூ.1,02,928-ஐயும் திருப்பித் தருமாறு வாடிக்கையாளர் சேவையைத் தொடர்பு கொண்டு கோரிக்கை விடுத்தார்.
ஆனால், அவரது வங்கிக் கணக்கிற்கு ரூ.67,334 மட்டுமே திருப்பி அனுப்பப்பட்டது. இண்டிகோ நிறுவனம் ரூ.27,996-ஐயும், மேக் மை ட்ரிப் நிறுவனம் ரூ.7,500-ஐயும், இதரக் கட்டணங்களாக ரூ.2,000-ஐயும் என மொத்தம் சுமார் ரூ.40,000-ஐ எவ்வித நியாயமான காரணமுமின்றி பிடித்தம் செய்து அதிர்ச்சியளித்தன. இதனால் மன உளைச்சலுக்கு ஆளான அவர், “இண்டிகோவிடம் கேட்டால் மேக் மை ட்ரிப்பைக் காட்டுகிறது, அவர்களிடம் கேட்டால் இண்டிகோவிடம் பேசச் சொல்கிறது; இனி ஒருபோதும் உங்கள் சேவையைப் பயன்படுத்த மாட்டேன்” என சமூக வலைதளத்தில் தனது குமுறலை வெளிப்படுத்தினார்.
இப்பதிவு இணையத்தில் வைரலாகிப் பரபரப்பை ஏற்படுத்தியதைத் தொடர்ந்து, இண்டிகோ நிறுவனம் இதற்கு அதிகாரப்பூர்வமாக விளக்கமளித்துள்ளது. அப்பதிவிற்குப் பதிலளித்துள்ள இண்டிகோ, “திருமதி சக்சேனா, உங்களைத் தொலைபேசியில் தொடர்பு கொள்ள முயன்றும் எங்களால் முடியவில்லை. தற்போதைய நிலவரப்படி சம்பந்தப்பட்ட PNR எண்ணுக்கான முழுப் பணமும் திருப்பி அளிக்கப்பட்டுள்ளது. எனவே, அந்த முழுப் பணத்தையும் திரும்பப் பெற நீங்கள் முன்பதிவு செய்த முகவரை தொடர்பு கொள்ளுமாறு அன்புடன் கேட்டுக்கொள்கிறோம்; உங்களுக்கு ஏற்பட்ட சிரமத்திற்கு மனப்பூர்வமாக வருந்துகிறோம்” என்று தெரிவித்து இப்பிரச்சினைக்கு முற்றுப்புள்ளி வைக்க முயன்றுள்ளது.