“அவங்க வருவாங்கன்னு நினைச்சேன்.. அம்மா, அண்ணன் உடல்களாகத் தான் கிடைச்சாங்க”… கதறும் 14 வயது சிறுமி… . ஒட்டுமொத்த நாட்டையும் அழ வைத்த சம்பவம்…!!!

ஜபல்பூர் பர்கி அணைப் பகுதியில் ஏற்பட்ட கோரப் படகு விபத்து, ஒரு குடும்பத்தின் மகிழ்ச்சியான சுற்றுலாப் பயணத்தை ஈடுகட்ட முடியாத பேரிழப்பாக மாற்றியுள்ளது. டெல்லியைச் சேர்ந்த மாஸ்ஸி குடும்பத்தினர் ஜபல்பூரில் உள்ள உறவினர் வீட்டு விழாவிற்காக வந்திருந்த நிலையில், உல்லாசப் படகில் சென்றபோது பலத்த புயல் மற்றும் அலைகளால் படகு கவிழ்ந்து விபத்துக்குள்ளானது. இதில் மெரினா மாசி, அவரது நான்கு வயது மகன் திரிஷான் மற்றும் மெரினாவின் தாயார் என ஒரே குடும்பத்தைச் சேர்ந்த மூவர் உயிரிழந்தனர். மீட்புப் பணியின் போது, மெரினா தனது மகனை உயிர் காப்புச் சட்டைக்குள் போர்த்தி, இறுதி மூச்சு வரை மார்போடு அணைத்திருந்த உருக்கமான காட்சி மீட்புக் குழுவினரையே கண்கலங்கச் செய்தது.

இந்த விபத்தில் உயிர் பிழைத்த 14 வயது சிறுமி சியா (பிஹு), அந்தப் பயங்கரமான தருணங்களை வேதனையுடன் விவரித்தார். வானிலை மோசமடைந்தபோதே படகைத் துறைமுகத்தில் நிறுத்துமாறு பயணிகள் வலியுறுத்தியும், ஊழியர்கள் அதைப் பொருட்படுத்தாமல் படகை நீரின் நடுப்பகுதிக்குச் செலுத்தியதாக அவர் குற்றம் சாட்டினார். படகின் ஜன்னல்கள் உடைந்து கீழ்த்தளத்தில் நீர் புகுந்ததால், அங்கு அமர்ந்திருந்த மெரினாவும் சிறுவன் திரிஷானும் வெளியேற முடியாமல் சிக்கிக்கொண்டனர். மேலும், உயிர் காப்புச் சட்டைகள் முன்கூட்டியே வழங்கப்படவில்லை என்றும், சியாவின் தந்தையும் மற்றொரு நபரும்தான் அலமாரியை உடைத்து சட்டைகளை விநியோகித்ததாகவும் அதிர்ச்சிகரமான தகவல்கள் வெளியாகியுள்ளன.

பர்கி அணை விபத்தில் இதுவரை 9 உடல்கள் மீட்கப்பட்டுள்ள நிலையில், அதிகாரிகளின் அலட்சியமே இத்தனை உயிர்களைப் பறித்துள்ளதாகப் புகார்கள் எழுந்துள்ளன. “என் தாயும் சகோதரனும் எப்படியாவது உயிர் பிழைத்திருப்பார்கள் என்று இரவு முழுவதும் நம்பிக்கையுடன் இருந்தேன், ஆனால் காலையில் அவர்கள் உடல்களாகவே மீட்கப்பட்டனர்” என்று சியா கதறியது காண்போரை நெகிழ வைத்தது. ஒரு மகிழ்ச்சியான குடும்ப சந்திப்பு, பாதுகாப்பு குறைபாடுகளாலும் ஊழியர்களின் மெத்தனத்தாலும் பெரும் சுடுகாடாக மாறியிருப்பது தேசத்தையே உலுக்கியுள்ளது. இச்சம்பவம் தொடர்பாக மாநில அரசு விசாரணைக்கு உத்தரவிட்டுள்ளதோடு, பாதுகாப்பு விதிமுறைகள் குறித்துக் கடுமையான கேள்விகள் எழுப்பப்பட்டு வருகின்றன.