மத்திய கிழக்கில் இஸ்ரேல், அமெரிக்கா மற்றும் ஈரான் இடையே மூண்டுள்ள போர், அங்குள்ள வளைகுடா நாடுகளில் மீன்பிடித் தொழிலுக்காகச் சென்றுள்ள தமிழக மீனவர்களின் வாழ்வாதாரத்தையும் பாதுகாப்பையும் கேள்விக்குறியாக்கியுள்ளது. அணு ஆயுத விவகாரம் தொடர்பாகத் தொடங்கிய இந்த மோதலில், ஈரானின் உச்ச தலைவர் கமேனி கொல்லப்பட்டதைத் தொடர்ந்து போர் உச்சக்கட்டத்தை எட்டியுள்ளது. இரு தரப்பும் ஏவுகணைகளை வீசித் தாக்கி வருவதால், திரும்பிய பக்கமெல்லாம் குண்டுகள் வெடிக்கும் சத்தம் கேட்பதாக அங்குள்ள மீனவர்கள் அச்சம் தெரிவித்துள்ளனர்.
குறிப்பாக, கன்னியாகுமரி மாவட்டத்தைச் சேர்ந்த நூற்றுக்கணக்கான மீனவர்கள் விசா பெற்று வளைகுடா நாடுகளில் தங்கி, அங்குள்ள நிறுவனங்கள் அல்லது முதலாளிகளுக்காக ஆழ்கடல் மீன்பிடித் தொழிலில் ஈடுபட்டு வருகின்றனர். தற்போது நிலவி வரும் போர்ச் சூழலால், கடலுக்குச் செல்ல முடியாத நிலை ஏற்பட்டுள்ளதுடன், தங்கியிருக்கும் இடங்களிலும் பாதுகாப்பு இல்லாத சூழல் நிலவுகிறது. உணவு மற்றும் அத்தியாவசியத் தேவைகளுக்காகக் கூட வெளியே வர முடியாமல் அவர்கள் தவித்து வருகின்றனர்.
பாதிக்கப்பட்ட மீனவர்கள் ஊடகங்களுக்கு அளித்துள்ள பேட்டியில், வான்வழித் தாக்குதல்கள் மற்றும் தொடர் குண்டுவெடிப்புகளால் தாங்கள் கடும் மன உளைச்சலுக்கு ஆளாகியுள்ளதாகக் கூறியுள்ளனர். தங்களின் உயிருக்கு எப்போது வேண்டுமானாலும் ஆபத்து ஏற்படலாம் என்ற அச்சத்தில் இருக்கும் அவர்கள், தங்களைப் பத்திரமாக மீட்டுத் தாயகம் அழைத்து வர வேண்டும் என மத்திய மற்றும் மாநில அரசுகளுக்கு உருக்கமான கோரிக்கை விடுத்துள்ளனர். போர் தீவிரமடைந்து வருவதால், தூதரக ரீதியிலான நடவடிக்கைகள் மூலம் தங்களை மீட்குமாறு அவர்கள் வலியுறுத்துகின்றனர்.
மத்திய அரசு இந்த விவகாரத்தில் உடனடியாகத் தலையிட்டு, வளைகுடா நாடுகளில் சிக்கியுள்ள தமிழக மீனவர்களின் பட்டியலைச் சேகரித்து, அவர்களைச் சிறப்பு விமானங்கள் அல்லது கப்பல்கள் மூலம் மீட்க நடவடிக்கை எடுக்க வேண்டும் என்பதே மீனவர் குடும்பங்களின் எதிர்பார்ப்பாகும். போர்க்களமாக மாறியுள்ள மத்திய கிழக்கில் இருந்து தங்களின் உறவுகள் பாதுகாப்பாக வீடு திரும்புவார்களா என்ற ஏக்கத்தில் ஆயிரக்கணக்கான குடும்பங்கள் தற்போது காத்திருக்கின்றன.