வெறும் 27 கிலோ எடை…. 16 வயது ஆட்டிச சிறுவனை பட்டினி போட்டு கொன்ற தாய், பாட்டி…. வீட்டுக்குள் நடந்த கொடுமை…. பதறவைக்கும் சம்பவம்….!

நியூயார்க்கின் பிராங்க்ஸ் (Bronx) பகுதியில், 16 வயதான ஆட்டிஸத்தால் பாதிக்கப்பட்ட அடோனிஸ் ஜார்விஸ் (Adonis Jarvis) என்ற சிறுவனைப் பட்டினி போட்டுப் படுகொலை செய்ததாக அவனது தாய் ஜெனீவா ஜார்விஸ் (36) மற்றும் பாட்டி டெனிஸ் ஜார்விஸ் (62) ஆகியோர் கைது செய்யப்பட்டுள்ளனர். மார்ச் 19 அன்று மருத்துவமனைக்குக் கொண்டு செல்லப்பட்ட அச்சிறுவன், தீவிர ஊட்டச்சத்துக் குறைபாடு காரணமாக உயிரிழந்ததைத் தொடர்ந்து, பிரேதப் பரிசோதனை அறிக்கையின் அடிப்படையில் இது ஒரு கொலை என மருத்துவப் பரிசோதகர்கள் உறுதி செய்தனர். உயிரிழந்த போது அச்சிறுவன் வெறும் 60 பவுண்டுகள் (சுமார் 27 கிலோ) மட்டுமே எடையுடன் இருந்ததாகவும், அவனது இரட்டைச் சகோதரனும் இதேபோன்று பட்டினியால் பாதிக்கப்பட்டுத் தற்போது மருத்துவமனையில் சிகிச்சை பெற்று உயிர் தப்பியுள்ளதாகவும் அதிகாரிகள் தெரிவித்துள்ளனர்.

இரு சிறுவர்களும் பேச முடியாத நிலை கொண்டவர்கள் என்பதோடு, அவர்கள் நீண்டகாலமாகப் புறக்கணிக்கப்பட்டு, நீர்ச்சத்துக் குறைபாடு மற்றும் உடல் முழுவதும் புண்களுடன் கொடுமைப்படுத்தப்பட்டுள்ளனர் என காவல்துறை தெரிவித்துள்ளது. இவர்கள் வசித்து வந்த ஈஸ்ட் 147-வது தெருவில் உள்ள அடுக்குமாடி குடியிருப்பு அசுத்தமாகவும், மனிதர்கள் வாழத் தகுதியற்ற முறையிலும் குப்பைகளால் நிறைந்திருந்ததாகக் கட்டிடக் கண்காணிப்பாளர் கூறியுள்ளார். அண்டை வீட்டாரிடம் அதிகம் பேசாமல் தனிமைப்பட்டு வாழ்ந்து வந்த இந்த இரு பெண்களும் வியாழக்கிழமை நீதிமன்றத்தில் ஆஜர்படுத்தப்பட்டு, பிணை வழங்கப்படாமல் சிறையில் அடைக்கப்பட்டுள்ளனர். இந்தச் சம்பவம் அப்பகுதியில் பெரும் அதிர்ச்சியையும் சோகத்தையும் ஏற்படுத்தியுள்ளது.